Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 350 Hüküm no: 389 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Nikola’nın Ahmed b. Abdullah’dan ziyade alacak davasından men edildiği Fi’l-asl medîne-i İzmir sükkânından olup hâlâ mahrûse-i Galata‘da Câmi‘-i Cedîd mahallesinde müsâferet vechi üzere mütemekkin işbu hâmilü’r-rakīm Yanaki v. Nikola nâm zimmî meclis-i şer‘de Ahmed b. Abdullah nâm kimesne mahzarında üzerine da‘vâ ve takrîr-i kelâm edip mezbûr Ahmed bundan akdem Malta cezîresinde harbî kefereye esîr ve giriftâr olmağla mezbûr Ahmed kendüye şartı’r-rücû‘ emriyle yed-i harbîden iki yüz yirmi beş guruşa tahlîs ve bu tarafa geldikde meblağ-ı mezbûrun yirmi dört guruşunu yedinden ahz bâkī iki yüz guruşunu taleb ederim suâl olunup edâya tenbîh olunmak matlûbumdur dedikde gıbbe’s-suâl mezbûr Ahmed cevâbında fi’l-vâki‘ müdde‘î-i mezbûr emriyle ancak yüz otuz altı guruşa tahlîs eyleyip ve meblağ-ı mezbûrun yirmi dört guruşunu yedinden ahz etmeğle müdde‘î-i merkūm zimmetinde ancak yüz on iki guruş deyni olduğunu ikrâr lâkin ziyâdeyi inkâr edicek müdde’î-i merkūmdan ziyâde da‘vâsını mübeyyine beyyine taleb olundukda ityân-ı beyyineye kādir olmayıp ve tâlib-i tahlîf dahi olmamağın mûcebiyle müdde‘î-i mersûm ziyâde doksan sekiz guruş mutâlebesiyle mezbûr Ahmed’e bî-vech mu‘ârazadan ba‘de’l-men‘ ikrârı mertebesi olan yüz on iki guruşu müdde‘î-i merkūma edâya mezbûr Ahmed’e tenbîh birle mâ-hüve’l-vâkı‘ bi’l-ibtigā ketb olundu. Fi’l-yevmi’s-sânî min-Saferi’l-hayr sene 1138. Şuhûdü’l-hâl: Halil Çelebi b. Mustafa, Süleyman Efendi b. Osman, İbrahim b. Mustafa, Mustafa Beşe b. Receb, Mustafa b. Ahmed, Mehmed b. Ahmed.