Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 351 Hüküm no: 390 Orijinal metin no: [57a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zeyneb bt. Hüseyin ile el-Hâc Mehmed Ağa b. Ahmed’in sulh oldukları Mahrûse-i Galata muzâfâtından kasaba-i Kasımpaşa’da Seferikoz mahallesinde sâkine ve zâtı Süleyman Beşe b. Osman ve Ömer Çelebi b. Yahya nâm kimesne ta‘rîfleriyle mu‘arrefe olan Zeyneb bt. Hüseyin nâm hâtunu meclis-i şer‘de işbu râfi‘u’l-kitâb el-Hâc Mehmed Ağa b. Ahmed nâm kimesne mahzarında ikrâr ve takrîr-i kelâm edip mezbûr el-Hâc Mehmed Ağa’ya <> mukaddemâ hâl-i sugūrumda yedi sene mütevâliyeten hizmet eyleyip hâlâ sinîn-i mezbûrede mezbûr el-Hâc Mehmed Ağa’dan ecr-i misl da‘vâsına tasaddî eylediğimde ol dahi mukaddemâ seni cihâzlayıp âhara tezvîc eylemiş idim deyü def‘a tasaddî etmeğle beynimizde münâza‘ât-ı kesîre cereyân etmiş idi el-hâletü hâzihî beynimize muslihûn tavassut [edip] da‘vâ-yı mezkûremden mezbûr el-Hâc MehmedAğa ile beni on beş guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru ba‘de’l-kabûl ve bedel-i sulh olan meblağ-ı mezbûr on beş guruşu mezbûr el-Hâc Mehmed Ağa yedinden işbu meclis-i şer‘de tamâmen ahz u kabz eylediğimden sonra ecr-i mislime müte‘allika âmme-i da‘vâdan mezbûr el-Hâc Mehmed Ağa ile zevcesi Rukiye bt. Hüseyin nâm hâtunun zimmetlerini ibrâ-i âmm-ı kātı‘u’n-nizâ‘la ibrâ ve ıskāt eylediğimde mezbûr el-Hâc Mehmed Ağa dahi bedel-i sulh-i mezbûra vesâire müte‘allika âmme-i da‘vâdan benim zimmetimi ibrâ ve ıskāt eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâdî ve’l-ışrîn min-Muharremi’l-harâm sene 1138. Şuhûdü’l-hâl: Memed b. Ahmed, Ahmed Çelebi el-münâdî, Süleyman Beşe b. Osman, Ömer b. Yahya, İbrahim b. İbrahim, Hüseyin Çavuş, es-Seyyid Ahmed b. Mahmud, İbrahim b. Muharrem, Halil b. Mustafa.