Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 352 Hüküm no: 391 Orijinal metin no: [57a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Neslihan bt. el-Hâc Mehmed’in vârislerinin, vasîleri el-Hâc Süleyman b. Mehmed’den hisselerini tahsil ettikleri Mahrûse-i Galata’da Câmi‘-i Kebîr mahallesinde sâkine iken bundan akdem müteveffiye olan Neslihan bt. el-Hâc Mehmed b. Mehmed’in verâseti li-ebeveyn kız karındaşları Emine ve Havva nâm hâtunlar ile vasiyet bi’s-sülüsüne inhisârı tahakkukundan sonra mezbûre Emine Hâtun’a asâleten ve mezbûre Havva Hâtun tarafından ibrâ-yı câi’z-zikri ikrâra vekîli olduğu zât-ı mezbûreyi ma‘rifet-i şer‘iyye ile ârifân Molla Abdurrahim b. Osman Efendi ve es-Seyyid Mustafa b. Hüseyin şehâdetleriyle mahzar-ı hasm-ı münkirde şer‘an sâbit ve vekâlete hükm-i şer‘î lahık olan İmâm Osman Efendi b. Abdullah Efendi vekâleten mahfel-i şer‘-i hatîr-i lâzimü’t-tevkīrde müteveffât-ı mezbûrenin sülüs-i mâlına bâ-hüccet-i şer‘iyye vasiyy-i muhtârı olmağla terekesine bi’l-vesaye vaz‘-ı yed eden işbu râfi‘u’l-vesîka el-Hâc Süleyman b. Mehmed mahzarında her biri bi’l-asâle ve bi’l-vekâle ikrâr ve takrîr-i kelâm edip müteveffât-ı mezbûre Neslihan Hâtun’un terekesinden gerek nükūd ve esâs-ı beyt ve evânî-i nühâsiye ve eşyâ-yı sâiresini vasiyy-i mezbûr el-Hâc Süleyman ile beynimizde tevzî‘ ve taksîm edip ve kız karındaşım müvekkile-i merkūme Havva Hâtun ile her birimiz sülüs hisselerimize isâbet eden mikdâr vasiyy-i mezbûr el-Hâc Süleyman yedinden tamâmen alıp kabz eylediğimizden sonra müteveffât-ı mezbûre Neslihan’ın kalîl ü kesîr ve celîl ü hakīr [57b] terekesinden sülüs hisselerimize müte‘allika âmme-i de‘âvî ve mutâlebât ve eymân ve muhâsamâtdan ben kız karındaşım müvekkile-i mezbûre Havva Hâtun vasiyy-i mezbûr el-Hâc Süleyman ile zevcesi Âişe bt. Ali ve kebîre kızı Emetullâh’ın zimmetlerini ibrâ-i âmm-ı kātı‘u’n-nizâ‘la ibrâ ve ıskāt eyledik dediklerinde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ min-Saferi’l-hayr sene 1138. Şuhûdü’l-hâl: Arusi Mustafa Efendi, Ahmed Efendi b. Süleyman, Süleyman Efendi b. Osman, Ali Efendi b. Ömer Efendi, Mustafa Efendi b. Mehmed, İbrahim Çelebi b. Muharrem, Halil Çelebi b. Mustafa, Mehmed b. Ahmed, İbrahim b. Mustafa.