Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 353 Hüküm no: 392 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Ahmed’in kendisini İğneada’da yaralayan kimselerden davacı olduğu El-emru kemâ zükira fîhi nemakahu’l-fakīr ileyhi azze şânuhû el-Hâc Mustafa el-Kādî bi-medîneti Galata. Mahrûse-i Galata’da Kürkcükapısı’nda vâki‘ Benderi Mehmed’in kahvesinde sâkin mellah tâifesinden işbu râfi‘u’l-vesîka Mehmed Beşe b. Ahmed nâm mecrûh meclis-i şer‘-i şerîf-i nebevîde es-Seyyid İbrahim b. Mehmed ve Ahmed Beşe b. Mehmed ve diğer İbrahim b. Mehmed ve Ömer b. Mehmed nâm kimesneler mahzarlarında üzerlerine da‘vâ ve takrîr-i kelâm edip târih-i kitâbdan on iki gün mukaddem Karadeniz’de İğneada nâm mahalde eşhâs-ı merkūmeden mezbûr diğer İbrahim âlet-i cârihadan mec ta‘bîr olunur iki yüzlü âlet ile ba‘de’l-asr sağ budumdan amden bi-gayrı hakkın darb ve cerh eyledikden sonra mezbûrûn es-Seyyid İbrahim ve Ahmed Beşe ve Ömer dahi mu‘înet birle bıçak ile başıma ve sol tarafıma amden darb ve cerh etmeleriyle mezbûrûndan suâl olunup mûceb-i şer‘îsi icrâ olunmak matlûbumdur dedikde gıbbe’s-suâl mezbûrûndan her biri husûs-ı merkūmu bi’l-külliye inkâr etmeleriyle müdde‘î-i merkūmdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup zikr olunan kahvede sâkin İbrahim b. Ahmed ve Osman b. Şa‘ban nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka târih-i kitâbdan on iki gün mukaddem ânifen zikr olunduğu üzere Karadeniz’de vâki‘ İğneada nâm mahallde eşhâs-ı merkūmeden mezbûr diğer İbrahim âlet-i cârihadan mec ta‘bîr olunur iki yüzlü âlet ile ba‘de’l-asr bizim huzûrumuzda müdde‘î-i mezbûr Mehmed’i sağ budundan amden bi-gayrı hakkın darb ve cerh eyledikden sonra mezbûrûn es-Seyyid İbrahim ve Ahmed Beşe ve Ömer dahi müdde‘î-i mezbûru yine huzûrumuzda bıçak ile başına ve sol tarafına kezâlik amden bi-gayrı hakkın darb ve cerh eylediler biz bu husûsa bu vech üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın cerâhât-ı mezkûrâtın mûcibleri ber’-i tâmma tevkīf olunup mâ-vaka‘a bi’l-ibtigā ketb olundu. Fi’l-yevmi’s-sâlis min-Saferi’l-hayr sene 1138. Şuhûdü’l-hâl: Mehmed Beşe b. Mustafa, Azaklı Cerrah Mehmed Çelebi, el-Hâc Hüseyin Reis b. Abdullah, el-Hâc Mehmed b. el-Hâc Mustafa, Bektaşi Abdurrahim Çelebi, Mustafa Beşe b. Receb, Mehmed b. Ahmed.