Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 353 Hüküm no: 393 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Iskati v. Yordan’ın varislerinden Yeraki’nin bağ hissesini Tanaş v. Lefter’e sattığı Mahrûse-i Galata muzâfâtından İstinye nâhiyesine tâbi‘ Tarabya nâm karyede sâkin iken bundan akdem hâlik olan Iskati v. Yordan nâm zimmînin verâseti zevce-i metrûkesi Makrule bt. Yordan nâm Nasrâniye ile sulbî kebîr oğulları Yeraki ve Todori nâm zimmîlere ve sulbiye kebîre kızı Loksani’ye münhasıra olduğu lede’ş-şer‘i’l-enver zâhir ve mukarrer oldukdan sonra merkūm Yeraki meclis-i şer‘de işbu sâhibü’r-rakīm Tanaş v. Lefter nâm zimmî muvâcehesinde ikrâr ve takrîr-i kelâm edip babam hâlik-i merkūmun terekesinden olup karye-i mezbûre bağları hilâlinde vâki‘ bir tarafdan Palaş nâm zimmî bağı ve bir tarafdan Zoğrato nâm zimmî bağı ve bir tarafdan fundalık ve bir tarafdan tarîk-i âm ile mahdûd kürûmu mülk bağda olan hisse-i irsiyye-i şer‘iyye-i şâyi‘amı merkūm Tanaş tarafından îcâb ve kabûlü hâvî bey‘-i bâtt-ı sahîh-i şer‘î ile yirmi guruşa bey‘ u temlîk ve teslîm eylediğimde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûru merkūm Tanaş yedinden tamâmen alıp kabz eylediğimden sonra bağ-ı mahdûd-ı mezkûra ve semenine ve târih-i kitâba gelince beynizimde cereyân eden sâir husûsa müte‘allika âmme-i da‘vâdan merkūm Tanaş’ın zimmetini ibrâ ve ıskāt eyledim ba‘de’l-yevm bağ-ı mahdûd-ı mezbûrda olan hisse-i irsiyye-i sâirem merkūm Tanaş’ın mülk-i müşterâsı olup benim kat‘an alâka ve medhalim kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin min-Saferi’l-hayr sene 1138. Şuhûdü’l-hâl: İbrahim Çelebi b. Muharrem, Halil Çelebi b. Mustafa, Molla Mehmed b. Yusuf, İbrahim b. Mustafa, Mehmed b. Ahmed, Ali b. Ahmed, Mustafa b. Ahmed.