Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 354 Hüküm no: 394 Orijinal metin no: [57b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Mustafa’nın Molla Osman b. Mustafa Efendi’den alacak davasında sulh olduğu Mahrûse-i Galata tevâbi‘inden kasaba-i Tophane’de Çavuşbaşı mahallesinde sâkine ve zâtı karındaşı Mehmed Beşe b. Mustafa ve Mübaşir Ali Çavuş b. Abdullah nâm kimesneler ta‘rîfleriyle mu‘arrefe olan Havva bt. Mustafa nâm hâtun meclis-i şer‘de ashâb-ı hayrâtdan merhûm Mustafa Çelebi Vakfı’na bi’l-fi‘il mütevellî olan işbu râfi‘u’l-vesîka Molla Osman b. Mustafa Efendi huzûrunda ikrâr ve takrîr-i kelâm edip ben bundan akdem mezbûr Molla Osman’dan mâl-ı vakf-ı mezbûrdan olmak üzere kırk guruş istidâne ve kabz edip meblağ-ı mevkūf-ı mersûm mukābelesinde yüz elli guruş kıymetli bir incili serpuş ve yedi paftalı bir incili kuşağımı rehin vaz‘ ve teslîm edip ba‘de zamânin meblağ-ı mevkūf-ı mersûmu kendüye edâ ve teslîm edip rehin vaz‘ eylediğim eşyâlarımı taleb eylediğimde birkaç gün mürûrunda gel vereyim bendedir dedikden sonra birkaç gün mürûrunda eşyâlarımı varıp taleb eylediğimde zâyi‘ oldu deyü iddi‘â etmeğle mukaddemâ kendüden istidâne ve edâ eylediğim mâl-ı mevkūf-ı mersûmu kırk guruşumu hükm-i hâkimi’ş-şer‘de alıp eşyâ-yı mezbûrların kıymetleri te‘addîsine binâen yüz elli guruş olduğu isbât sadedinde olduğumda beynimizde münâza‘ât-ı kesîre vâki‘ olmuş idi el-hâletü hâzihî beynimize muslihûn tavassut edip da‘vâ-yı mezkûremden beni mezbûr Molla Osman ile on beş guruş üzerine inşâ-i akd-i sulh eylediklerinde ben dahi ber-vech-i muharrer sulh-i merkūmu kabûl ve bedel-i sulh olan meblağ-ı mezbûr on beş guruşu yedinden tamâmen alıp kabz eylediğimden sonra eşyâ-yı mezbûrelere vesâir târih-i kitâba gelince beynimizde cereyân eden ahz u i‘tâya müte‘allika âmme-i de‘âvî ve mutâlebât ve eymân ve muhâsamâtdan mezbûr Molla Osman’ın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-âşir min-Saferi’l-hayr sene 1138. Şuhûdü’l-hâl: Sipahi Ahmed Efendi, Arusi Mustafa Efendi, Berber Eyüb b. Receb, Fincani Ahmed Ağa, el-Hâc Ali Ağa b. el-Hâc Mehmed, el-Hâc Mehmed b. Abdülkādir, Mehmed Yazıcı b. Abdullah, Ahmed Çelebi b. Mehmed.