Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 355 Hüküm no: 395 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hatun’un kocası es-Seyyid Mustafa Reis’ten boşandığı El-emru hasbemâ yahvîhi nemakahu’l-fakīr ileyhi sübhânehû el-Hâc Mustafa el-Kādî bi-medîneti Galata -gufira lehû-. Mahrûse-i Galata[da] el-Hâc A‘mâ mahallesinde sâkine Rukiye nâm hâtunun babası ve tarafından zikrî câîyi ikrâra vekîli olduğu zât-ı mezbûreyi ma‘rifet-i şer‘iyye ile ârifân Mustafa Ağa b. Yahya ve Molla Mehmed b. Hasan nâm kimesneler şehâdetleriyle sâbit olan el-Hâc Mustafa b. Mehmed Efendi <> nâm kimesne meclis-i şer‘de dâmâdı işbu râfi‘u’l-kitâb es-Seyyid Mustafa Reis b. es-Seyyid Ali nâm kimesne mahzarında bi’l-vekâle ikrâr ve takrîr-i kelâm [edip] dâmâdım mezbûr es-Seyyid Mustafa zevcesi ve kızım müvekkile-i mezbûre Rukiye Hâtun’u târih-i kitâb günü tatlîk etmeğle zimmetinde mütekarrır ve ma‘kūdün-aleyh olan yüz guruş mehr-i mü’ecceli ile nafaka-i iddet ve me’ûnet-i süknâsı mukābelesinde mezbûr es-Seyyid Mustafa Reis Acem esîrlerinden tahmînen on yaşında ma‘lûmetü’l-evsâf Âişe nâm câriye-i memlûkesini kızım müvekkile-i mezbûre Rukiye Hâtun’a def‘ u teslîm eyledikde kızım müvekkile-i mezbûre Rukiye Hâtun dahi ahz u kabz eyledikden sonra husûs-ı zevciyyete ve târih-i kitâba gelince sâir ahz u i‘tâya müte‘allika âmme-i de‘âvî ve mutâlebât ve eymân ve muhâsamâtdan her biri âharın zimmetini ibrâ ve ıskāt eylediler dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâdî aşer min-Saferi’l-hayr sene 1138. Şuhûdü’l-hâl: Mehmed Ağa b. Yahya, Molla Mehmed b. Hasan, es-Seyyid Mustafa b. Hasan, es-Seyyid Ali b. Mehmed, el-Hâc Ali b. Abdullah, Süleyman Çelebi b. Ali, Mehmed Çelebi b. Mustafa, el-Hâc Mehmed b. Ali, Hüsrev Çelebi b. İbrahim, İbrahim b. Muharrem, Halil Çelebi b. Mustafa, Mustafa b. Ahmed, Mehmed b. Ahmed.