Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 356 Hüküm no: 396 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Mustafa Reis’in Rukiye Hatun’a nafaka ödeyeceği Mahrûse-i Galata’da el-Hâc A‘mâ mahallesinde sâkine Rukiye nâm hâtunun babası ve tarafından husûs-ı âti’l-beyâna vekîli olduğu zât-ı mezbûreye ma‘rifet-i şer‘iyye ile ârifân Mustafa Ağa b. Yahya ve Molla Mehmed b. Hasan nâm kimesneler şehâdetleriyle sâbit olan el-Hâc Mustafa b. Mehmed Efendi nâm kimesne meclis-i şer‘de müvekkile-i mezbûrenin zevc-i mutallıkı es-Seyyid Mustafa Reis b. es-Seyyid Ali nâm kimesne mahzarında bi’l-vekâle ikrâr ve takrîr-i kelâm edip dâmâdım mezbûr es-Seyyid Mustafa Reis’in firâşından hâsıl ve kızım müvekkile-i mezbûre Rukiye Hâtun’dan tevellüd bi-hükmi’l-hıdâne hâlâ hacr ve terbiyesinde olan es-Seyyid Ali ve es-Seyyid Veli nâm sagīrânın nafaka ve kisve bahâya eşedd-i ihtiyâcları olmağın sagīrân-ı mezbûrân için babaları mezbûr es-Seyyid Mustafa Reis üzerine cânib-i şer‘den mikdâr-ı kifâye meblağ farz ve takdîr olunmak matlûbumdur dedikde hâkim-i muvakkı‘-ı a‘le’l-kitâb -rafa‘a kadrahû mevlâhü’l-vahhâb- efendi hazretleri dahi tarafeynin rızâlarıyla sagīrân-ı mezbûrânın her birine yedişer buçuk akçeden babaları mezbûr es-Seyyid Mustafa Reis üzerine târih-i kitâbdan yevmî on beş akçe farz ve takdîr eyleyip meblağ-ı mefrûz-ı mezkûru sagīrân-ı mezbûrânın nafaka ve kisve vesâir levâzım-ı zarûriyyelerine harc ve sarfa ve lede’l-iktizâ istidâneye ve ınde’z-zafer babaları mezbûr es-Seyyid Mustafa Reis üzerine rücû‘a müvekkile-i mezbûre Rukiye Hâtun’a izin verilmeğin mâ-hüve’l-vâkı‘ bi’l-ibtigā ketb olundu. Fi’l-yevmi’l-hâdî aşer min-Saferi’l-hayr sene 1138. Şuhûdü’l-hâl: es-Sâbikūn.