Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 356 Hüküm no: 397 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mahmud b. Mehmed’in Ümmühâni bt. Ali’ye nafaka ödeyeceği Mahrûse-i Galata hâricinde Bedreddin Bey mahallesinde sâkine zâtı Ali Çelebi b. Şa‘ban ve el-Hâc Mehmed b. Abdullah nâm kimesneler ta‘rîfleriyle mu‘arrefe olan işbu râfi‘atü’l-vesîka Ümmühâni bt. Ali nâm hâtun meclis-i şer‘de zevc-i sâbıkı el-Hâc Mahmud b. Mehmed nâm kimesne mahzarında takrîr-i kelâm ve ta‘bîr ani’l-merâm [edip] mezbûr el-Hâc Mahmud’un firâşından hâsıl ve benden mütevellid bi-hakkı’l-hıdâne hacr ve terbiyemde olan işbu sagīr oğlum Mehmed’in nafaka ve kisve bahâya eşedd-i ihtiyâcı olup ve mezbûr el-Hâc Mahmud ancak yevmî beşer akçeye kudretim olup ziyâdeye kudretim yokdur deyü bundan akdem gıyâbımda ihbâr ve i‘lâm etdirmeğin meblağ-ı mezbûr beş akçe sagīr-i mezbûrun yevmî nafaka ve kisve ve levâzım-ı sâiresine vefâ etmemeğin sagīr-i mezbûr için babası mezbûr el-Hâc Mahmud üzerine kadr-i ma‘rûf nafaka ve kisve bahâ farz ve takdîr olunmak murâdımdır dedikde hâkim-i muvakkı‘-ı sadr-ı kitâb tûbâ-lehû ve hüsnü-meâb efendi hazretleri dahi sagīr-i mezbûr Mehmed’in nafaka ve kisve ve levâzım-ı sâiresiʼçün babası mezbûr el-Hâc Mahmud üzerine tarafeynin rızâ ve ittifâklarıyla târih-i kitâbdan yevmî altışar akçe farz ve takdîr edip ve meblağ-ı mefrûz-ı merkūmu sagīr-i mezbûr Mehmed’in nafaka ve kisve ve levâzım-ı zaruriyyesine harc ve sarfa ve lede’l-iktizâ istidâneye ve inde’z-zafer babası mezbûr el-Hâc Mahmud üzerine rücû‘a mezbûre Ümmühâni Hâtun’a izin verilmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis min-Saferi’l-hayr sene 1138. Şuhûdü’l-hâl: Ali Çelebi b. Şa‘ban, el-Hâc Mehmed b. Abdullah, Ahmed Çelebi b. Ali, Abdullah Çelebi b. Mehmed, Mehmed Çelebi b. el-Hâc Mustafa, Halil Çelebi b. Mustafa, İbrahim b. Mustafa.