Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 357 Hüküm no: 398 Orijinal metin no: [58a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. İstavri’nin Yani v. Hristo’dan alacak davasında sulh olduğu Bakkal tâifesinden Yorgi v. İstavri nâm Ermeni meclis-i şer‘de yine tâife-i mezbûreden işbu râfi‘u’r-rakīm Yani v. Hristo nâm zimmî muvâcehesinde ikrâr ve takrîr-i kelâm edip merkūm Yani’ye bundan akdem kırk guruş ücret[le] bir sene hizmet edip meblağ-ı mezbûrun yirmi guruşunu yedinden ahz u kabz ve yirmi guruşunu dahi zimem-i nâsda olan hukūkundan ahz etmek üzere bana emr etmeğle ben dahi merkūmun emrine binâen zimemden ancak sekiz guruş ahz ve kabz eylediğim cihetle merkūm Yani zimmetinde meblağ-ı mezbûrdan on iki guruş hakkım bâkī kaldığından mâ‘adâ mahrûse-i Galata hısnı ebvâbından Mumhâne kapısı dâhilinde vâki‘ bakkal dükkânında merkūm Yani’ye şerîk olduğumda ba‘de zamânin dükkândan hâsıl olacak fâideden bana edâ eylemek üzere mâlımdan alâ tarîki’l-karz on sekiz guruş def‘ u teslîm eylemiş idim deyü merkūm Yani’den cem‘an otuz guruş da‘vâ eylediğimde ol dahi târih-i kitâbdan altı ay mukaddem fesh-i şirket edip beynimizde hesâb gördüğümüzde dükkân-ı mezbûrda zarar ve hüsrân vâki‘ olmağla meblağ-ı mecmû‘-ı merkūm otuz guruşa vesâire müte‘allika âmme-i da‘vâdan benim zimmetimi ibrâ ve ıskāt eyledin deyü def‘a tasaddî etmeğle beynimizde münâza‘ât-ı kesîre cereyân etmiş idi el-hâletü hâzihî beynimize muslihûn tavassut edip da‘vâ-yı mezkûremden merkūm Yani ile beni altı guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh-i mezbûr altı guruşu yedinden tamâmen alıp kabz eylediğimden sonra husûs-ı mezbûra ve târih-i kitâba gelince sâir beynimizde cereyân eden ahz u i‘tâ ve mu‘âmelât-ı şettâya müte‘allika âmme-i da‘vâdan merkūm Yani’nin zimmetini ibrâ ve ıskāt eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-âşir min-Saferi’l-hayr sene 1138. Şuhûdü’l-hâl: İbrahim b. Muharrem, Halil Çelebi b. Mustafa, Mustafa Beşe b. İbrahim, İbrahim b. Mustafa, Mustafa b. Receb, Ali b. Ahmed, el-Hâc Mehmed b. Abdullah, Yani v. Aleksi, Yorgaki v. İstati, Dimo v. Yorgi, Yani v. Dimo.