Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 358 Hüküm no: 399 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaşya b. Duka’nın mülk menzil ve bağını Atami v. Canto’ya sattığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden mevlânâ Mustafa Efendi b. Hasan irsâl olunup ol dahi mahrûse-i Galata muzâfâtından Beşiktaş nâhiyesine tâbi‘ Arnavud karyesinde sâkine Anaştaşya bt. Duka Voyvoda nâm Nasrâniyenin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde şahsı Papa Partanyoz v. Vasil ve Ligoraşko v. Kostantin Voyvoda ve Anaştaş v. Yorgi ve Yovan v. Yorgi nâm zimmîler ta‘rîfleriyle mu‘arrefe olan merkūme Anaştaşya meclis-i ma‘kūd-ı mezkûrda işbu hâmilü’r-rakīm Atami v. Canto nâm zimmî muvâcehesinde ikrâr ve takrîr-i kelâm edip karye-i mezbûrede vâki‘ bir tarafdan kenîse bahçesi ve bir tarafdan ba‘zen Hürmüz ve ba‘zen Rali nâm zimmîler mülkleri ve bir tarafdan dere ve bir tarafdan tarîk-i âm ile mahdûd fevkānî üç bâb oda ve bir matbah ve ahur ve mahzen ve bi’r-i mâ ve bahçeyi müştemil olup hâlâ icâre-i şehriye ile sâkine olduğum işbu mu‘âyene olunan mülk menzili yedimde mülk ve hakkım olduğu hâlde bin yüz on dokuz senesi Muharemü’l-harâmının onuncu günü merkūm Atami’ye yedinde olan mübâya‘a hücceti nâtıka olduğu üzere iki bin yüz otuz iki guruşa bey‘ u teslîm ve kabz-ı semen eylemiş idim binâen alâ-zâlik menzil-i mahdûd-ı mezkûra ve kurbünde vâki‘ yalı ta‘bîr olunur menzil ve hisâr bağları hilâlinde vâki‘ bağa ve târih-i kitâba gelince beynimizde cereyân eden sâir <> husûslara müte‘allika âmme-i da‘vâdan merkūm Atami’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm merkūm Atami ile vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde gıbbe’t-tasdîki’ş-şer‘î vâki‘ hâli mevlânâ-yı mezkûr mahallinde ketb ü tahrîr ve ma‘an ba‘s olunan Çukadâr Süleyman Beşe b. Abdullah ve Muhzır Ali Çelebi b. Ahmed ile mahfel-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Saferi’l-hayr sene 1138. Şuhûdü’l-hâl: Hüseyin Ağa b. Süleyman, Bostani Mustafa b. Mahmud, Mahmud Çavuş b. Mustafa, İsmail b. Hüseyin, Usta Mehmed Ağa b. Hüseyin, Mehmed Çelebi b. Hasan, Ali Çelebi b. Ahmed, Bezzazistani Abdullah Çelebi, Ahmed Çelebi b. Abdullah, Münadi Ahmed Çelebi, Mustafa Çelebi b. Mahmud, Mehmed Çelebi b. Yusuf, Salih Efendi kâtib-i dîvân, Kürkcübaşı Manolaki v. Yani, Rali v. Mihail, Yamandi v. Todori, Anaşte v. Yenaki, Yenaki v. Tanaş, Panayot v. Yani, Paskal v. Dimitri, Yamandi v. Yorgaki.