Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 359 Hüküm no: 400 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Salih’in boşanma üzerine ettiği yeminini tutamadığının tespiti Hukūkullâhda şehâdetde sebk-i da‘vâ şart olmamağla min-gayri da‘vâ-yı ahad mahmiye-i İstanbul’da Haydarpaşa mahallesinde sâkin el-Hâc Mehmed b. el-Hâc Halil ve Debbâğ Yunus mahallesinde sâkin el-Hâc Ömer b. Hasan ve mahrûse-i Galata tevâbi‘inden kasaba-i Tophane’de Tomtom mahallesinde sâkin Yelkenci el-Hâc Abdullah b. Mustafa nâm kimesneler li-ecli’ş-şehâde meclis-i şer‘de şart-ı câi’z-zikri münkir olan es-Seyyid Salih b. es-Seyyid el-Hâc Ali muvâcehesinde zevce-i menkûhası Hadice bt. Ahmed nâm hâtun hâzır olduğu hâlde her biri şöyle edâ-i şehâdet-i şer‘iyye eylediler ki mezbûr es-Seyyid Salih târih-i kitâbdan bir hafta mukaddem eğer ben ba‘de’l-yevm bir dahi balıkcılık ve kayıkcılık san‘atını işlersem zevcem Hadice Hâtun bt. Ahmed benden talâk-ı selâse ile mutallaka olsun deyü bizim huzûrumuzda <> şart ve ta‘lîk eyledikden sonra mezbûr es-Seyyid Salih dört gün mukaddem Kavak’da kayıkcılık eylediğini yine bizim huzûrumuzda kirâren ve mirâren ikrâr ve bizi işhâd eyledi binâen alâ-zâlik mezbûre Hadice Hâtun şart-ı merkūmun vukū‘una binâen zevci mezbûr es-Seyyid Salih’den talâk-ı selâse ile mutallaka olmuşdur biz bu husûsa bu vecih üzere şâhidleriz şehâdet dahi ederiz deyü her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu Fi’l-yevmi’s-sâdis aşer min-Saferi’l-hayr sene 1138. Şuhûdü’l-hâl: Halil Efendi başkâtib, Sipahi Ahmed Efendi, Ömer Efendizâde Ali Efendi, Süleyman Efendi b. Osman, İbrahim b. Muharrem, Halil Çelebi b. Mustafa, Mustafa b. Ahmed, İbrahim b. Mustafa, Mehmed b. Ahmed, Mustafa b. Receb.