Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 359 Hüküm no: 401 Orijinal metin no: [58b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Salih’in boşandığı karısına olan borçlarını ve çocuğu doğuruncaya kadar da nafaka ödeyeceği Mahrûse-i Galata tevâbi‘inden kasaba-i Kasımpaşa’da Yel değirmeni mahallesinde sâkine olup zâtı ta‘rîf-i şer‘î ile mu‘arrefe olan işbu râfi‘atü’l-vesîka Hadice bt. Ahmed nâm hâtun meclis-i şer‘de zevc-i mutallıkı es-Seyyid Salih b. es-Seyyid el-Hâc Ali mahzarında üzerine da‘vâ ve takrîr-i kelâm edip mezbûr es-Seyyid Salih ba‘de’l-yevm balıkcılık ve kayıkcılık eylersem benden zevcem mezbûre Hadice talâk-ı selâse ile mutallaka olsun deyü şart ve ta‘lîk edip ve şart-ı mezkûrun vukū‘u muvâcehesinde şer‘an sâbit olmağla ben mezbûrdan talâk-ı selâse ile mutallaka olmuş idim binâen alâ-zâlik mezbûrun zimmetinde mütekarrır ve ma‘kūdün-aleyh olan üç bin yüz akçe mehr-i mü’eccelimi taleb ederim suâl olunsun dedikde gıbbe’s-suâl mezbûr es-Seyyid Salih cevâbında hâl bi’l-cümle müdde‘iyye-i merkūme Hadice Hâtun’un ânifen takrîr eylediği minvâl-i muharrer üzere olduğu ikrâr ve i‘tirâf etmeğin mûcebiyle meblağ-ı mezbûr üç bin yüz akçeyi müdde‘iyye-i mezbûreye edâ ve teslîme mezbûr es-Seyyid Salih’e tenbîh <> olundukdan sonra mezbûre Hadice Hâtun yine meclis-i mezkûrda mezbûr es-Seyyid Salih mahzarında i‘âde-i kelâm edip mezbûrun firâşından hâsıl hâlâ batnımda mevcûd hamlim olmağla vaz‘-ı haml edinceye değin benim için kadr-i kifâye nafaka bahâ farz ve takdîr olunmak matlûbumdur dedikde hâkim-i muvakkı‘-ı a‘le’l-kitâb -rafa‘a kadrahû mevlâhü’l-vahhâb- efendi hazretleri dahi tarafeynin rızâlarıyla mezbûre Hadice için vaz‘-ı haml edinceye değin târih-i kitâbdan beher yevm beşer para nafaka bahâ farz ve takdîr edip meblağ-ı mefrûz-ı merkūmu vaz‘-ı haml edinceye değin kendi nafaka vesâir levâzım-ı zarûriyyesine harc ve sarfa ve vakt-i zarûretde istidâneye ve ınde’z-zafer mezbûr es-Seyyid Salih üzerine rücû‘a mezbûre Hadice’ye izin verilmeğin mâ-vaka‘a bi’l-ibtigā ketb olundu. Fi’l-yevmi’s-sâbi‘ aşer min-Saferi’l-hayr sene 1138. Şuhûdü’l-hâl: İbrahim b. Muharrem, Halil Çelebi b. Mustafa, Baba Yusuf b. Abdullah, Mehmed b. Ahmed Bursalı, Süleyman b. Ahmed, Ayaspaşalı Mehmed, Ali b. Mustafa ve’s-sâbikūn.