Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 360 Hüküm no: 402 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Abdullah’ın alacak davasında Kalaycı el-Hâc Ahmed b. İbrahim’in vârisleriyle sulh olduğu Husûs-ı âti’l-beyânın mahallinde keşf ve taksîmi bâbında fermân-ı âlî sâdır olmağın imtisâlen leh savb-ı şer‘-i enverden mevlânâ Süleyman Efendi b. Osman me’zûnen irsâl olunup ol dahi hâssa mi‘mârlardan Üstâd Mehmed Halife b. Abdullah ve diğer Mehmed Halife b. İsmail ile mahrûse-i Galata muzâfâtından kasaba-i Tophane’de Tomtom mahallesinde sâkin iken bundan akdem vefât eden Kalaycı el-Hâc Ahmed b. İbrahim b. Abdullah’ın hayâtında sâkin olduğu menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde müteveffâ-yı mezbûrun verâseti sulbiye kebîre kızları Âişe ve Ümmügülsüm ve İsmihan nâm hâtunlar ile li-ebeveyn er karındaşı Himmet nâm kimesneye münhasıra olduğu şer‘an sâbit ve nümâyân oldukdan sonra müteveffâ-yı mezbûrun ümm-i veledi işbu râfi‘atü’l-vesîka Saliha bt. Abdullah nâm hâtun meclis-i ma‘kūd-ı mezbûrda mezbûr Himmet ile mezbûrât Âişe ve Ümmügülsüm ve İsmihân mahzarlarında bi-tav‘ihâ ikrâr ve takrîr-i kelâm edip mevlâm müteveffâ-yı mezbûr el-Hâc Ahmed hâl-i hayâtında mahalle-i mezbûre de ve bir tarafdan Dökmecibaşı İbrahim Ağa mülkü ve bir tarafdan el-Hâc Mehmed mülkü ve bir tarafdan kalaycı mülkü ve bir tarafdan tarîk-i âm ile mahdûd ulyâda iki bâb oda ve bir sofa ve kenîf ve vüstâda iki bâb oda ve dehlîz ve matbahı müştemil işbu mu‘âyene olunan kebîr mülk menzilin vüstâsında zikr olunan hudûddan Dökmecibaşı İbrahim Ağa tarafında vâki‘ bir bâb kebîr oda ile tereke-i sâiresinin sülüsünü bana vasiyet etmeğle ben dahi oda-i mezbûr ile sülüs-i mezbûru verese-i mezkûreden taleb ve da‘vâ sadedinde olmuş idim el-hâletü hâzihî beynimize muslihûn tavassut edip beni da‘vâ-yı mezkûremden verese-i mezkûre ile zikr olunan oda ile dökmecibaşı tarafında vâki‘ verese-i merkūmenin sâkin oldukları oda tahtında vâki‘ terbî‘an otuz beş zirâ‘ arsayı bana vermek üzere sulh eylediklerinde ben dahi ber-vech-i muharrer sulh-i mezbûru kabûl ve zikr olunan oda ile arsa-i merkūmeyi müceddeden sokak kapısı açmak üzere ifrâz ve bana ta‘yîn ve teslîm ben dahi ahz u kabz ve mâ-beynine alâmât-ı fâsıla vaz‘ olundukdan sonra menzil-i merkūme verese-i merkūmeden iddi‘â eylediğim menzil-i merkūm matbahına ve arsa-i merkūm üzerinde vâki‘ ebniyeye ve müteveffâ-yı mezbûrun kalîl ü kesîr tereke-i sâiresine müte‘allika âmme-i da‘vâdan ben mezbûr Himmet ile mezbûrât Âişe ve Ümmügülsüm ve İsmihan’ın zimmetlerini ibrâ-i âmm-ı kātı‘u’n-nizâ‘la ibrâ ve ıskāt eylediğimde onlar dahi zikirleri mârrolan oda ve arsaya müte‘allika âmme-i da‘vâdan kezâlik benim zimmetimi ibrâ ve ıskāt eylediler dedikde gıbbe’t-tasdîki’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an [ba‘s] olunan Çukadâr Mustafa ve Muhzır Mustafa ile mahfel-i şer‘a gelip alâ-vukū‘ihî inhâ ve takrîr etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis min-Saferi’l-hayr sene 1138. Şuhûdü’l-hâl: el-Hâc Mehmed b. el-Hâc Ali, İbrahim b. Ali, Molla Ömer b. Ali, es-Seyyid Ali Ağa b. Hasan, Mustafa b. Abdullah, Şa‘ban b. Ali, İbrahim b. Mustafa.