Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 361 Hüküm no: 403 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Ahmed’in Zeyneb Hatun bt. Abdullah ile alacak davasında sulh oldukları El-emru hasbemâ yahvîhi nemakahu’l-fakīr ileyhi azze şânuhû el-Hâc Mustafa el-Kādî bi-medîneti Galata el-mahrûse -gufira leh-. Mahmiye-i İstanbul’da Tavşantaşı kurbünde sâkine Âişe Hâtun bt. Ahmed zâtı ba‘de’t-ta‘rîfi’ş-şer‘î meclis-i şer‘-i şerîf-i nebevîde işbu râfi‘atü’l-vesîka Zeyneb Hâtun bt. Abdullah mahzarında ikrâr ve takrîr-i kelâm edip mezbûre Zeyneb Hâtun’un ber-mûceb-i hüccet-i şer‘iyye silk-i mülkünde münselik olup mahrûse-i Galata muzâfâtından kasaba-i Fındıklı’da Selim Hâtun mahallesinde vâki‘ bir tarafdan Mehmed Çelebi veresesi tasarruflarında olan vakıf menzil ve bir tarafdan Aşcı Mehmed Paşa veresesi tasarruflarında olan vakıf menzil ve bir tarafdan ba‘zen Hayyât el-Hâc Ali mülkü ve ba‘zen tarîk-i hâs ve bir tarafdan tarîk-i âm ile mahdûd fevkānî iki bâb oda ve dehlîz ve tahtânî iki bâb oda ve kenîf ve iki bi’r-i mâ ve bir mikdâr bahçeyi müştemil senevî merhûm Sultan Bayezid Hân Vakfı’na on iki akçe mukāta‘a-i kadîmesi olan mülk menzil zevcim olup bundan akdem vefât eden Derviş el-Hâc Yusuf b. Mustafa b. Abdullah’ın ile’l-vefât mülkü olmağla ba‘de vefâtihî rub‘u bana isâbet etmeğin menzil-i mahdûd-ı mezkûrdan bana isâbet eden hisse-i irsiyyemi mezûre Zeyneb Hâtun’dan taleb ve da‘vâ eylediğimde ol dahi menzil-i mezbûru müteveffâ-yı merkūmun mukaddemâ mülkü olduğunu ikrâr ve lâkin müteveffâ-yı mezbûr Derviş el-Hâc Yusuf hâl-i hayâtında târih-i kitâbdan altı buçuk sene mukaddem Halil b. Yusuf nâm kimesneye iki yüz elli guruş semen-i medfû‘a ve makbûza bey‘ u teslîm edip mezbûr Halil dahi iştirâ ve tesellüm ve kabûl eyledikden sonra mezbûr Halil dahi bin yüz otuz üç senesi Cemâziyelevveli gurresinde işbu mahkeme-i şerîfde hilâfeten müvellâ olan es-Seyyid Ahmed Efendi huzûrunda menzil-i mahdûd-ı mezkûru iki yüz beş guruş semen-i makbûza bana bey‘ u teslîm ben dahi ber-vech-i mübeyyin iştirâ ve tesellüm ve kabûl eyledim deyü mazmûnu min-külli’l-vücûh takrîr-i meşrûhuna muvâfık bir kıt‘a hüccet-i şer‘iyye ibrâz eylediğinden gayri mezbûr Derviş el-Hâc Yusuf hâl-i hayâtında fevtinden beş sene mukaddem seni talâk-ı selâse ile tatlîk etmeğle sen mutallakası olduğun hâlde vefât eyledi ref‘ ve def‘-i meşrûhunu isbât sadedinde olmağla beynizimde münâza‘ât-ı kesîre cereyân etmiş idi el-hâletü hâzihî beynimize muslihûn tavassut edip da‘vâ-yı mezkûremden beni mezbûre Zeyneb Hâtun ile on beş guruş üzerine inşâ-i akd-i sulh eylediklerinde ben dahi ber-vech-i muharrer sulh-i mezbûru kabûl ve bedel-i sulh olan meblağ-ı mezbûr on beş guruşu mezbûre Zeyneb Hâtun yedinden tamâmen ahz u kabz eylediğimden sonra menzil-i mezbûra vesâire müte‘allika âmme-i da‘âvî ve mutâlebât ve eymân ve muhâsamâtdan mezbûre Zeyneb Hâtun’un zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm menzil-i mahdûd-ı mezbûra müte‘allika mezbûre Zeyneb Hâtun ile vechen mine’l-vücûh da‘vâ ve nizâ‘ım kalmadı dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ aşer min-Saferi’l-hayr sene 1138. Şuhûdü’l-hâl: İmâm Ahmed Efendi b. Mustafa, el-Hâc Şems b. Ahmed, Ahmed Çelebi b. Mustafa, Mustafa Ağa b. Hasan, Ali b. Yusuf, İbrahim b. Ahmed, Hasan b. Abdullah, Sırmakeş Mustafa, Bursalı Mehmed, Mübaşir İsmail Çavuş.