Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 362 Hüküm no: 404 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Zeynelabidin’in kendine ait binâsıyla sahip olduğu arsanın yarı hissesini Ahmed Çelebi b. Mustafa’ya, Ahmed Çelebi’nin de arsadaki yarı hissesini es-Seyyid Yahya Efendi’ye sattığı El-emru kemâ zükira fîhi nemakahu’l-fakīr ileyhi sübhânehû ve te‘âlâ el-Hâc Mustafa el-Kādî bi-medineti Galata el-mahrûse -gufira lehû-. Mahmiye-i İstanbul’da Davudpaşa mahallesinde sâkin Hüseyin Ağa b. Zeynelabidin nâm kimesne meclis-i şer‘-i şerîfde hâlâ Bâb nâibimiz umdetü’l-kudāti’l-müteşerri‘în işbu kitâb-ı sıhhat-nisâbın sâhibi es-Seyyid Yahya b. el-merhûm es-Seyyid Mehmed Efendi mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ müşterî-i mûmâ-ileyhin bahçesine muttasıl olan bir tarafdan müşterî-i mûmâ-ileyh mülkü ve bir tarafdan yine ba‘zen müşterî-i mûmâ-ileyh mülkü ve ba‘zen vakıf odalar ve iki tarafdan tarîk-i âm ile mahdûd tûlen on üç zirâ‘ ve arzen yedi zirâ‘ bi-hesâb-ı terbî‘i doksan bir zirâ‘ arsa üzerinde kâin iki bâb tahtânî odanın mecmû‘ binâsı benim ve arsanın nısfı benim ve nısf-ı âharı işbu hâzır bi’l-meclis Ahmed Çelebi b. Mustafa’nın olmağla ben mülküm olan binâ-i merkūm ile nısf arsa-i mezbûreyi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile mûmâ-ileyh es-Seyyid Yahya Efendi’ye yetmiş guruşa bey‘ u temlîk ve teslîm eylediğimde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı merkūm yetmiş guruşunu mûmâ-ileyh yedinden tamâmen ahz u kabz ve ebniye-i merkūme ile arsa-i merkūmenin gabn-ı tağrîrine müte‘allika âmme-i da‘vâdan mûmâ-ileyh es-Seyyid Yahya Efendi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm hudûd-ı mezbûr dâhilinde olan ebniyenin mecmû‘u ile arsa-i merkūmenin nısfı müşterî-i mûmâ-ileyhin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mezbûr Ahmed Çelebi b. Mustafa yine meclis-i mezbûrda mûmâ-ileyh es-Seyyid Yahya Efendi mahzarından ikrâr ve takrîr-i kelâm edip menzil-i mahdûd-ı mezbûr arsasının ânifen zikr olunduğu üzere nısf-ı şâyi‘i bâyi‘-i mezbûr Hüseyin Ağa’nın ve nısf-ı şâyi‘-i âharı benim mülküm olmağın ben dahi arsa-i merkūmede olan nısf hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile mûmâ-ileyh es-Seyyid Yahya Efendi’ye on beş guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabûl eyledikden sonra semeni olan meblağ-ı merkūm on beş guruşu müşterî-i mûmâ-ileyh yedinden tamâmen alıp kabz eyleyip nısf hisse-i merkūmenin semenine ve gabn-ı tağrîrine müte‘alli âmme-i da‘vâdan müşterî-i mûmâ-ileyhin zimmetini ibrâ ve ıskāt eyledim ba‘de’l-yevm arsa-i mersûmede olan nısf hisse-i şâyi‘am müşterî-i mûmâ-ileyhin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ aşer min-Saferi’l-hayr sene 1138. Şuhûdü’l-hâl: el-Hâc İbrahim Hammâmî, İsmail Çavuş Ağa, Yağlıkcı Ömer Ağa, Kasap Ahmed Beşe, Hüseyin Çelebi b. İbrahim, Ahmed Efendi b. Mehmed Efendi, Mustafa Efendi b. Mehmed, Evliya Mustafa Çelebi, Süleyman Efendi b. Osman, İbrahim b. Muharrem, Halil Çelebi b. Mustafa, Bursalı Mehmed b. Ahmed, Sırmakeş Mustafa b. Ahmed.