Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 364 Hüküm no: 405 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Büyük hissesi Saliha bt. el-Hâc Ahmed’in olan Şahkulu mahallesindeki vakıf hamamın hissedarlara bölüştürülmesi mümkün olmadığından sırayla tasarruf etmelerine karar verildiği El-emru hasbemâ yahvîhi nemakahu’l-fakīr ileyhi azze şânuhû el-Hâc Mustafa el-Kādî bi-medîneti Galata el-mahrûse -gufira lehû-. Ashâb-ı hayrâtdan merhûm Katib Mehmed Efendi Vakfı’ndan mahrûse-i Galata hâricinde Şahkulu mahallesinde vâki‘ ma‘lûmü’l-hudûd bir bâb dükkan ve odun yerini müştemil vakıf hamâmın icâre-i mu‘accele ve yevmî on akçe icâre-i mü’eccele ile on sehimde üç sehimi es-Seyyid Mehmed Eyüb ile vasîsi olduğu es-Seyyid Halil b. el-Hâc Mustafa nâm sagīrin ve yedi sehimi Saliha bt. el-Hâc Ahmed nâm hâtunun iştirâken tasarruflarında olduğu lede’ş-şer‘i’l-enver zâhir ve mütebeyyin oldukdan sonra mezbûr es-Seyyid Halil kendi tarafından asâleten sagīr-i mezbûr es-Seyyid Halil’in tesviye-i emrini rü’yete bâ-hüccet-i şer‘iyye kıbel-i şer‘den mansûb vasîsi olmağla vesayeten mahfil-i şer‘de mezbûre Saliha Hâtun tarafından ikrâr-ı câi’z-zikri tasdîke vekîli olduğu zât-ı mezbûreyi ma‘rifet-i şer‘iyye ile ârifân Mehmed Çavuş b. İsmail ve Mehmed b. el-Hâc İsmail nâm kimesneler şehâdetleriyle mahzar-ı hasm-ı câhidde şer‘an sâbit ve vekâletine hükm-i şer‘î lahik olan işbu râfi‘u’l-vesîka el-Hâc Ahmed b. Mustafa mahzarında vakf-ı mezbûrun bi’l-fi‘il mütevellîsi el-Hâc Ömer Efendi b. Mehmed hâzır olduğu hâlde bi’l-asâle ve bi’l-vesaye üzerine tasvîr-i müdde‘â edip hamâmı mevkūf-ı mezbûr şer‘an kısmet kabûl eylememeğin hamâm-ı merkūmu müvekkile-i mezbûre Saliha Hâtun ile bi-kadri’l-hısas min-haysü’z-zamân beynimizde muhâiyeten zabt ve tasarruf murâd ederim suâl olunup vech-i muharrer üzere muhâiyeten zabt ve tasarrufa tenbih olunmak murâdımdır dedikde gıbbe’s-suâl vekîl-i mezbûr el-Hâc Ahmed cevâbında fi’l-vâki‘ müvekkile-i merkūme Saliha Hâtun hamâm-ı merkūmu ber-vech-i muharrer hisseleri mikdârı mühâiyeten zabt ve tasarrufa tâlibe ve râgıbe olduğunu ikrâr etmeğle hâkim-i muvakkı‘-ı a‘le’l-kitâb tûbâ-lehû ve hüsnü-meâb efendi hazretleri dahi tarafeynin taleb ve rızâlarıyla hamâm-ı merkūmu altı ay vasîsi olduğu sagīr-i mezbûr es-Seyyid Halil ile ma‘an mezbûr es-Seyyid Mehmed ve on dört ay dahi mezbûre Saliha Hâtun mühâiyeten bi’z-zamân vechi üzere zabt ve tasarruf etmeleriyle emr edip ve hamâm-ı mezbûru evvelen işbu târih-i kitâb senesi Saferü’l-hayrı gurresinden on dört ay tamâmına dek mezbûre Saliha Hâtun müstakıllen zabt edip ve müddeti tamâm oldukda hamâm-ı mezbûrdan hurûc ve sâniyen sagīr-i mezbûr es-Seyyid Halil ile ma‘an mezbûr es-Seyyid Mehmed altı ay müstakıllen tasarruf edip sâbıku’z-zikr mühâiyeten ilâ-en yettefika alâ-emr-i şer‘î âhar beynlerinde ibkā ve mukarrer kılmalarıʼçün mezbûr es-Seyyid Mehmed ile vekîl-i mezbûr el-Hâc Ahmed’e tenbîh birle mâ-hüve’l-vâkı‘ bi’l-ibtigā ketb olundu. Fi’l-yevmi min-gurre-i Saferi’l-hayr sene 1138. Şuhûdü’l-hâl: Sultan Hamamcısı Ali Efendi, Duacı Molla Mustafa, el-Hâc Hasan b. Hüseyin, el-Hâc İbrahim b. Mustafa, es-Seyyid Ahmed b. es-Seyyid Osman, es-Seyyid Ca‘fer b. Ali, İbrahim b. Muharrem.