Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 365 Hüküm no: 406 Orijinal metin no: [59b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. el-Hâc Hasan’ın Hasan Beşe b. Mustafa’dan muhalaa ile boşandığı Mahrûse-i Galata’da el-Hâc A‘mâ mahallesinde sâkine Saliha bt. el-Hâc Hasan nâm hâtun zâtı ba‘de’t-ta‘rîfi’ş-şer‘î meclis-i şer‘de zevc-i muhâlı‘ı işbu râfi‘u’l-vesîka Hasen Beşe b. Mustafa nâm kimesne mahzarında bi-tav‘ihâ ikrâr ve takrîr-i kelâm edip zevcim mezbûr Hasan Beşe ile beynimizde adem-i hüsn-i mu‘âşeretden nâşî hul‘a tâlibe ve râgıbe olduğum ecilden zimmetinde mütekarrır ve ma‘kūdün-aleyh olan iki bin akçe mehr-i mü’eccelimden geçip nafaka-i iddet ve me’ûnet-i süknâm dahi kendi üzerime olmak üzere zevcim mezbûr Hasan Beşe ile muhâla‘a-i sahîha-i şer‘iyye ile hul‘ olduğumda ol dahi ber-vech-i muharrer hul‘-i mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ ve ıskāt eyledik dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-hâmis ve’l-ışrîn min-Saferi’l-hayr sene 1138. Şuhûdü’l-hâl: Halil Çelebi b. Mustafa, Mustafa b. Ahmed, İbrahim b. Mustafa, Mehmed b. Ahmed, Ali b. Ahmed, Mehmed b. Ali.