Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 365 Hüküm no: 407 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostantin v. Duka’nın Ata v. Hanto’yla zimmetlerini ibra ettikleri Mahrûse-i Galata muzâfâtından Beşiktaş nâhiyesine tâbi‘ Arnavud nâm karye sâkinlerinden Kostantin v. Duka Velode nâm zimmî meclis-i şer‘de işbu sâhibü’r-rakīm Atam v. Hanto nâm zimmî muvâcehesinde bi-tav‘ihî ikrâr ve takrîr-i kelâm edip merkūm Atam’ın hâlâ karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd mülk menzilinde icâre-i şehriye ile sâkin olduğum cihtle menzil-i mezkûra ve kurbünde vâki‘ yalı ta‘bîr olunur mülk menzile ve Hisâr Bağları hilâlinde vâki‘ lede’l-ahâlî ma‘lûmü’l-hudûd kürûmu mülk bağa ve târih-i kitâba gelince beynimizde cereyân eden sâir husûslara müte‘allika âmme-i de‘âvî ve mutâlebât ve eymân ve muhâsamâtdan merkūm Atam’ın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm merkūm Atam ile vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’t-tâsi‘ min-Saferi’l-hayr sene 1138. Şuhûdü’l-hâl: Hüseyin Çavuş b. el-Hâc Ali, Münadi Mahmud Çelebi b. Mehmed, Münadi Ahmed Çelebi b. Mehmed, Mustafa Çelebi b. Mahmud, Ahmed Çelebi b. Abdurrahman, Bekir b. Süleyman, Bezzazistani Abdullah Çelebi b. Burhan, Mehmed Ağa b. Abdullah Bezzazistani, Mehmed Çelebi b. Yusuf, İbrahim b. Muharrem, Salih Efendi b. Ramazan, İbrahim b. Mustafa, Mustafa b. Receb, Halil Çelebi b. Mustafa, Mehmed b. Ahmed, Yusuf b. Abdullah, Sofyanos v. Tanaş, Yenaki v. Tanaş , Yamandi v. Toka, Kürkcübaşı Manolaki v. Yani, Panayot v. Yani, Paskal v. Dimitri, Yamandi v. Yorgaki, Anaşta v. Yanaki, Yamandi v. Toma.