Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 366 Hüküm no: 408 Orijinal metin no: [60a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. es-Seyyid Hüseyin b. es-Seyyid Mehmed’in vârislerinden Ayşe bt. Mustafa ile es-Seyyid Mehmed’in Hasan Beşe b. Davud’u şikâyetten men edildiği Mahrûse-i Galata nâhiyesinden İstinye nâhiyesine tâbi‘ Sarıyar nâm karyede sâkin iken bundan akdem vefât eden es-Seyyid Hüseyin b. es-Seyyid Mehmed’in verâsetini zevce-i metrûkesi Âişe bt. Mustafa nâm hâtun ile kebîre oğlu es-Seyyid Ali’ye ve kebîre kızı Şerife Hadice’ye ve sagīre kızı Şerife Fâtıma ile babası mezbûr es-Seyyid Mehmed’e münhasıra ve tashîh-i meselesi bi-hükmi’l-ferâiz doksan altı sehimden i‘tibâr olunup sihâm-ı mezbûreden on iki sehm mezbûre Âişe Hâtun’a ve otuz dört sehm mezbûr es-Seyyid Ali’ye ve yedişer sehm mezbretân Şerife Hadice ve Şerife Fâtıma’dan her birine ve on altı sehm mezbûr es-Seyyid Mehmed’e isâbet eylediği ve mezbûre Âişe Hâtun kızı sagīre-i mezbûre Şerife Fâtıma’nın tesviye-i umûruna kıbel-i şer‘den mansûbe vasîsi olduğu lede’ş-şer‘i’l-enver zâhir ve mütebeyyin oldukdan sonra mezbûr es-Seyyid Ali asâleten ve sagīre-i mezbûre anası ve vasîsi mezbûre Âişe Hâtun vesayeten meclis-i şer‘-i hâtîr-i lâzimü’t-tevkīrde mahmiye-i İstanbul’da Fenerkapısı dâhilinde sâkine Afife bt. Ahmed b. Abdullah nâm hâtunun zevci ve tarafından husûmet ve redd-i cevâba vekîli olduğu zât-ı mezbûreyi ma‘rifet-i şer‘iyye ile ârifân Ahmed b. Hasan ve Ziya b. Musli nâm kimesneler şehâdetleriyle sâbit olan işbu râfi‘u’l-kitâb Hasan Beşe b. Davud nâm kimesne mahzarında her biri bi’l-asâle ve bi’l-vesaye üzerine da‘vâ ve takrîr-i kelâm edip müteveffâ-yı mezbûrun terekesinden olup karye-i mezbûre bağları hilâlinde Kavak nâm mahallde vâki‘ bir tarafdan Süleyman Reis ve bir tarafdan Süleyman Çelebi ve bir tarafdan Ya‘kub Reis bağları ve bir tarafdan tarîk-i âm ile mahdûd iki bin guruş kıymetli kürûmu mülk bağı bin yüz otuz bir senesi Ramazân-ı şerîfinin üçüncü günü Ahi Çelebi Mahkemesi’nde nâibü’ş-şer‘i’ş-şerîf olan Ahmed Efendi huzûrunda verese-i mezkûre asâleten ve vesayeten yüz seksen guruş semen-i makbûza bey‘ u teslîm eylemişdik lâkin meblağ-ı mezbûrda gabn ve tağrîr olmağla akd-i mezbûr şer‘an sahîh olmamağın suâl olunup hîn-i bey‘de semen-i mislinin alıverilmesi murâdımızdır dediklerinde gıbbe’s-suâl vekîl-i mezbûr Hasan Beşe cevâbında fi’l-vâki‘ zevcesi müvekkile-i mezbûre Afife Hâtun bağ-ı mahdûd-ı mezkûru vech-i muharrer üzere yüz seksen guruş semen-i medfû‘a iştirâ eylediğini ikrâr lâkin gabn-ı merkūmu münkir olmağın husûs-ı mezbûru ahâlî-i karye-i mezbûreden istifsâr için tarafeynin taleb ve iltimâslarıyla savb-ı şerîf-i enverden mevlânâ Ahmed Efendi b. eş-Şeyh Süleyman irsâl olunup ol dahi Mübaşir Abdullah Çavuş ile karye-i mezbûreye varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i şerîf-i nebevî eyledikde evvelâ mezbûr es-Seyyid Ali ile ve sagīre-i mezbûre Âişe Hâtun ber-vech-i muharrer müdde‘âlarını mübeyyine beyyine taleb olundukda bir vecihle isbât-ı beyyineye kādir olmayıp ve sâniyen bağ-ı mahdûd-ı mezkûrun hîn-i bey‘de semen-i misli karye-i mezbûre ahâlîsinden vukūf-ı tâmmı olan bî-garaz Müslimînden istifsâr ve istihbâr eylediklerinde fi’l-hakīka bağ-ı mahdûd-ı mezkûrun hîn-i bey‘de semen-i misli ancak yüz seksen guruş olduğunu karye-i mezbûre sâkinlerinden Ali Ağa b. Mehmed ve Süleyman Reis b. Mehmed ve Mehmed b. Hasan ve Ali b. Ya‘kub ve Bektaş b. Mehmed ve İsmail Odabaşı b. Abdullah ve Habib Çelbi b. Süleyman ve Osman Ağa b. Mustafa ve Mustafa b. Hasan ve Yahya b. Mehmed ve Mehmed b. Süleyman ve Ahmed b. Ali ve Ali b. Hasan nâm kimesneler mezbûrân es-Seyyid Ali ve sagīre-i [mezbûre] Âişe Hâtun muvâcehelerinde alâ-tarîki’ş-şehâde haber verdiklerini mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Çukadâr Süleyman Bey b. Abdullah ve Muhzır Mustafa Çelebi b. Ahmed ile meclis-i şer‘a gelip alâ-vukū‘ihî inhâ ve takrîr etmeğin mûcebiyle mezbûrân es-Seyyid Ali ve Âişe Hâtun vekîl-i mezbûr Hasan Beşe’ye bî-vech mu‘ârazadan men‘ birle mâ-hüve’l-vâkı‘ bi’t-taleb ketb olundu. Fi’l-yevmi ( ) min-Saferi’l-hayr sene 1138. Şuhûdü’l-hâl: Müezzin Ebûbekir Çelebi b. Şa‘ban, Mustafa Çelebi b. Ahmed, Mehmed Çelebi b. Mustafa, Mübaşir Abdullah Çavuş b. Süleyman, Süleyman Bey b. Abdullah, Kādızâde Ali Ağa b. Ömer.