Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 367 Hüküm no: 409 Orijinal metin no: [60a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Kemaleddin mahallesindeki harab vakıf menzilin mütevellisi Salih Efendi b. Yahya tarafından eş-Şeyh Mehmed Efendi b. eş-Şeyh Ahmed Efendi’ye icara verildiği Husûs-ı âti’l-beyânın mahallinde ketb ü tahrîri iltimâs olunmağın bu fakīr bi-nefsihî mahrûse-i Galata a‘mâlinden Yeniköy nâhiyesine tâbi‘ Rumelihisârı’nda el-Hâc Kemaleddin mahallesinde vâki‘ zikri câî vakıf menzile varıp zeyl-i vesîkada muharrerü’l-esâmî Müslimîn huzûrlarında akd-i meclis-i âlî olundukda ber-muktezâ-yı ma‘nâ-yı mu‘ciz-nümâ fenzur ilâ-âsâri rahmetillâhi keyfe yuhyi’l-arda ba‘de mevtihâ inne zâlike’l-muhyi’l-mevtâ ve hüve alâ külli şeyin kadîr mazhar-ı müşâhede-i sun‘ullâhı ve lâyık-ı temâşâ-yı kudret-i samadânî olan erbâb-ı dekāyık-şinâsân a‘lâ şükûfe-perverân zümresinin bâ-berât-ı âlî şeyhi vâcibü’l-ikrâmları işbu râfi‘u’l-kitâb eş-Şeyh Mehmed Efendi b. eş-Şeyh Ahmed Efendi meclis-i ma‘kūd-ı mezbûrda mahalle-i merkūme imâmı olup menzil-i mevkūf-ı mezbûrun meşrûtiyyet üzere bi’l-fi‘il mütevellîsi olan Salih Efendi b. Yahya mahzarında tasvîr-i müdde‘â edip zikr olunan el-Hâc Kemaleddin mahallesinde vâki‘ bir tarafdan tasarrufumda olan yalı ve bir tarafdan sâhil-i bahr ve tarafeynden tarîk-i âm ve tarîk-i hâs ile mahdûd tûlen ve arzen bi-hesâb-ı terbî‘i yüz seken yedi zirâ‘ arsa üzerinde mebnî bir bâb çatma oda ve bir dehlîz ve tahtında kayık çekilir limanı müştemil işbu mu‘âyene ve müşâhede olunan harâb vakıf menzilin galle ve tevliyet ve tasarrufu mahalle-i merkūme imâmlarına meşrûta olup ve menzil-i merkūm ber-vech-i muharrer mürûr ve kürûr-ı a‘vâm ve şühûr [60b] harâb ve vîrân olup ve taraf-ı vakıfda dahi binâya bir vechile kudret ve müsâ‘ade olmayıp ve hâli üzere terk olunduğu takdîrce enkāz-ı mevcûdesi bi’l-külliye zâyi‘ ve telef olmağla vakfa mutazarrır olacağı zâhir olmağın mütevellî-i mezbûr Salih Efendi dahi yedime verdiği mümzâ ve mahtûm temessük mantûkunca menzil-i mevkūf-ı merkūmu mâlım ile üzerine her ne binâ ve ihdâs edersem mu‘accelesine mahsûb olmak üzere iki yüz guruş icâre-i mu‘accele-i makbûza ve beher şehr yüz seksen akçe icâre-i mü’eccele ile bi’t-tevliye bana îcâr ve teslîm edip ben dahi minvâl-i muharrer istîcâr ve tesellüm ve kabûl eylemiş idim binâen aleyh hâlâ hakīkat-i hâl mütevellî-i mezbûr ile sâir muvahhidînden istifsâr olunup haberleri tahrîr ve kıbel-i şerî‘at-ı garrâdan hüccet-i şer‘iyye tastîr olunması murâdımdır deyü tahkīk ve mütevellî-i mezbûr Salih Efendi dahi mûmâ-ileyh eş-Şeyh Mehmed Efendi’yi akvâl-i meşrûhasında tasdîk eyledikden sonra keyfiyet-i muharrere mahalle-i merkūme kurbünde vâki‘ mahallât-ı sâire ahâlîsinden li-ecli’l-ihbâr meclis-i ma‘kūd-ı mezbûrda hâzırûn olan mevsûkun-bih kimesnelerden Kale Dizdârı Mehmed Ağa b. el-Hâc İbrahim ve Kethüdâ-i Kale İbrahim Ağa b. Abdülkerîm ve Hammâmî İbrahim Ağa b. İsmail ve İmâm İbrahim Efendi b. Mehmed Efendi ve Müezzin Ali Halife b. el-Hâc Osman ve Osman Bey b. el-Hâc Ömer ve Ahmed Çelebi b. Mehmed vesâirlerinden istifsâr ve istihbâr olundukda fi’l-vâki‘ işbu mu‘âyene olunan harâb menzil-i mahdûd-ı mezbûrun galle-i tevliyet ve tasarrufu bâlâda zikr ü beyân ve tebyîn ve ayân olunduğu vech üzere zikr olunan el-Hâc Kemaleddin mahallesi imâmlarına meşrûta vakıfdır ve hîn-i vakfiyyetten bu âna gelince menzil-i mevkūf-ı mezbûrun gallesine mahalle-i mezbûre imâmları mutasarrıf olıgelmişdir deyü mezbûrûndan her biri keyfiyet-i muharrereyi alâ-tarîki’ş-şehâde haber vermeğin işbu vesîka-i enîka-i sahîha li-ecli’s-sened bi’l-ibtigā ketb olundu. Fî-gurre-i Saferi’l-hayr sene 1138. Şuhûdü’l-hâl: el-Hâc Ali Ağa b. Mehmed Ağa, Gümrükcü Mustafa Ağa b. Mehmed, es-Seyyid Mustafa b. Abdullah, es-Seyyid Mehmed b. Mustafa, es-Seyyid Ahmed b. Mehmed, Berber Ahmed b. Mehmed, Süleyman b. Abdullah, Osman Bey b. el-Hâc Ömer, el-Hâc İsmail.