Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 369 Hüküm no: 410 Orijinal metin no: [60b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer b. Abdülkerim’in Ereğli’ye giderken Akova’da bindiği şaykanın batmasıyla boğularak öldüğü Mahrûse-i Galata muzâfâtından kasaba-i Tophane’de Cihangir mahallesinde sâkine Saime bt. Durmuş b. Mehmed nâm hâtun tarafından zikri âtî istihbâra vekîli olduğu zât-ı mezbûreyi ma‘rifet-i şer‘iyye ile ârifân kürkcü tâifesinden Hüseyin b. Mehmed ve Mehmed b. İsmail nâm kimesneler şehâdetleriyle sâbit olan işbu râfi‘u’l-vesîka Mustafa b. Receb nâm kimesneden ber-vech-i âtî istihbâr-ı şer‘î sudûrundan sonra udûl-i ahrâr-ı ricâl-i Müslimînden yine tâife-i mezbûrdan Mehmed b. İsmail ve diğer Mehmed b. Resul nâm kimesneler li-ecli’l-ihbâr meclis-i şer‘a hâzırân olup isre’l-istihbâr fi’l-vâki‘ müvekkile-i mezbûre Saime Hâtun bt. Durmuş b. Mehmed’in zevci Dimicioğlu demeğle ma‘rûf Ömer b. Abdülkerîm b. Abdullah yüz otuz yedi Şa‘bân-ı şerîfinin yirmi yedinci günü Bakizâde şaykasıyla İstanbul’dan Ereğli’ye giderken esnâ-yı tarîkde Akova üzerinde şiddet-i rüzgâr ve fırtınadan nâşî zikr olunan şayka paralanıp biz dahi şayka-i mezbûre derûnunda olduğumuz cihetle mezbûr Ömer bizim huzûrumuzda garîkan vefât edip re’yü’l-ayn cenâzesini mu‘âyene eyledik deyü her biri keyfiyet-i muharrereyi alâ-tarîki’ş-şehâde haber vermeğin vâki‘ hâl hıfzan li’l-makāl ketb olndu. Fi’l-yevmi’l-hâmis ve’l-ışrîn min-Saferi’l-hayr senesemân ve selâsin ve mi’e elf. Şuhûdü’l-hâl: İbrahim Efendi b. Mehmed ve müezzin Ahmed Efendi b. İbrahim, Ahmed Efendi b. Süleyman, Mustafa Efendi b. Mehmed, Süleyman Efendi b. Osman.