Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 369 Hüküm no: 411 Orijinal metin no: [60b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şirketlerini fesheden Sakızlı Nilkorozi v. Bertuma ile Mirza v. Manuk’un birbirlerinin zimmetlerini ibra ettikleri Çukacı tâifesinden Sakızlı Nilkorozi v. Bertuma nâm zimmî meclis-i şer‘de mukaddemâ şerîki olan işbu râfi‘u’r-rakīm Mirza v. Manuk nâm Ermeni muvâcehesinde ikrâr ve takrîr-i kelâm edip merkūm Mirza ile bundan akdem Galata’da Bezzazistan kurbünde vâki‘ dükkânda şerîk olup hâl-i fesh-i şirket eyleyip beynimizde hesâb gördüğümüzde benim kat‘an sermâyem olmamağla ancak fâide-i hâsıladan bana isâbet eden hissemi merkūm Mirza yedinden bi’t-tamâm ve’l-kemâl ahzu kabz eylediğimden sonra şirket-i mezbûreye ve târih-i kitâba gelince cüz’î ve küllî beynimizde cereyân eden sâir ahz u i‘tâ ve mu‘âmelât-ı şettâya müte‘allika âmme-i de‘âvi ve mutâlebât ve eymân ve muhâsamâtdan merkūm Mirza’nın zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm merkūm Mirza ile vechen mine’l-vücûh ve sebeben mine’l-esbâb da‘vâ ve nizâ‘ım yokdur dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min-Saferi’l-hayr sene 1138. Şuhûdü’l-hâl: el-Hâc Ahmed Kapudân, el-Hâc Hasan b. Abdullah, Abacı el-Hâc Mustafa b. Ali, el-Hâc Ahmed b. Süleyman Çorbacızâde, Mehmed Çelebi b. Yusuf Bezzazistani, Münadi Ahmed Çelebi, Bezzazistani Abdullah Çelebi, Haffâf Abdullah Ağa.