Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 370 Hüküm no: 412 Orijinal metin no: [60b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Praşkov v. Efendol’ün istiğlâl yoluyla para vakfından borç aldığı Mahrûse-i Galata muzâfâtından Yeniköy nâhiyesine tâbi‘ Tarabya karyesi sâkinlerinden Praşkov v. Efendol nâm zimmî meclis-i şer‘-i hatîr-i lâzimü’t-tevkīrde ashâb-ı hayrâtdan el-Hâc Mehmed Efendi ve el-Hâc Osman Reis vakıfları nükūd-ı mevkūfesine bi’l-fi‘il mütevellî olan işbu râfi‘u’l-vesîka Mustafa Efendi b. el-Hâc Osman mahzarında ikrâr ve takrîr-i kelâm edip yedimde mülküm olup karye-i merkūmede vâki‘ bir tarafdan Papa Angeli menzili ve etrâf-ı selâseden tarîk-i âm ile mahdûd ve fevkānî üç bâb oda ve dehlîz ve tahtında bir mahzen ve kenîfi müştemil mülk menzil ile deryâ tarafında vâki‘ ma‘lûmü’l-hudûd fevkānî dört bâb oda ve tahtında fırın ve değirmen ve bakkal dükkânını müştemil mülk menzil-i âharımı ve karye-i merkūme bağları hilâlinde vâki‘ bir tarafdan Manol Reis bağı ve bir tarafdan İspelot zimmî bağı ve tarafeynden tarîk-i âm ile mahdûd bir kıt‘a kürûmu mülk bağımı mütevellî-i mezbûr Mustafa Efendi’ye bi-tarîki’l-istiğlâl safka-i vâhide ile iki yüz sekiz guruşa bey‘u teslîm edip ol dahi ber-minvâl-i muharrer iştirâ ve tesellüm ve kabûl eyledikden sonra semeni olan meblağ-ı mezbûru vakfeyn-i mezbûreyn mâllarından olmak üzere mütevellî-i mezbûr yedinden tamâmen alıp kabz eylediğimden sonra mütevellî-i merkūm Mustafa Efendi zikirleri mârr olan menziller ile bağ-ı mahdûd-ı merkūmu ba‘de’t-tahliyeti’ş-şer‘iyye ve’t-tekābuzi’l-mer‘î târih-i kitâbdan [61a] bir sene tamâmına değin otuz guruş ve sekiz paraya bana îcâr ve teslîm edip ben dahi ber-vech-i muharrer istîcâr ve kabûl eyledim dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’l-ışrîn min-Saferi’l-hayr sene semân ve selâsîn ve mi’e ve elf. Şuhûdü’l-hâl: ( ).