Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 370 Hüküm no: 413 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katibe bt. Abdullah’ın İbrahim b. Ali’den boşandığı Mahrûse-i Galata’da Kara Mustafa Paşa mahallesinde sâkine ve zâtı ta‘rîf-i şer‘i ile mu‘arrefe olan işbu râfi‘atü’l-vesîka Kâtibe bt. Abdullah nâm hâtun meclis-i şer‘de zevc-i mutallıkı İbrahim b. Ali nâm kimesne mahzarında üzerine da‘vâ ve takrîr-i kelâm edip zevcim mezbûr İbrahim târih-i kitâbdan bir gün mukaddem bâinen beni tatlîk etmeğle zimmetinde mütekarrır ve ma‘kūdün aleyh olan bin iki yüz akçe mehr-i mü’eccelim ile nafaka-i iddet ve me’ûnet-i süknâm mukābelesinde dahi ma‘lûmü’l-mikdâr hakkımın alıverilmesi murâdımdır dedikde gıbbe’s-suâl mezbûr İbrahim cevâbında fi’l-vâki‘ müdde‘iyye-i merkūme Katibe Hâtun bin iki yüz akçe mehr-i mü’eccel ile zevce-i menkûhası olup ve târih-i kitâbdan bir gün mukaddem tatlîk ettiğini ikrâr ve i‘tirâf etmeğin mûcebiyle müdde‘iyye-i mezbûrenin mehr-i mezkûru olan meblağ-ı mezbûr bin iki yüz akçe ile nafaka-i iddet ve me’ûnet-i süknâsı mukābelesinde dahi ta‘yîn olunan üç yüz akçe ki cem‘an bin beş yüz akçeyi müdde‘iyye-i mezbûre Katibe Hâtun’a edâ ve teslîme mezbûr İbrahim’e tenbîh birle mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min-Saferi’l-hayr sene 1138. Şuhûdü’l-hâl: İbrahim Çelebi b. Muharrem, Halil Çelebi b. Mustafa, İbrahim b. Mustafa, Ahmed Efendi b. Süleyman, Mustafa Çelebi b. Ahmed, Mehmed b. Ahmed.