Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 371 Hüküm no: 414 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Atami v. Hanto’nun Kostantin Voyvoda v. Duka’dan alacağını taksitlendirdiği Sâbıkā Boğdan Voyvodası olan Kostantin Voyvoda v. Duka mahfil-i şer‘de işbu hâmilü’r-rakīm Atami v. Hanto nâm zimmî muvâcehesinde ikrâr ve takrîr-i kelâm edip ben târih-i kitâba gelince merkūm Atami’nin mahrûse-i Galata’ya tâbi‘ Arnavud karyesinde vâki‘ ma‘lûmü’l-hudûd menzilinde on dokuz sene mikdârı icâre-i ma‘lûme ile sâkin olduğum cihetle hâlâ sinîn-i merkūmede müctemi‘a olan icâre vesâire beynimizde cereyân eden ahz u i‘tâyı hesâb ve kitâb eylediğimizde merkūm Atami’nin zimmetinde bin dokuz yüz guruş hakkı zuhûr etmeğin hâlâ meblağ(-ı mezbûr]bin dokuz yüz guruş cihet-i merkūmeden merkūm Atami’ye zimmetimde edâsı lâzım deynimdir dedikde gıbbe’t-tasdîki’ş-şer‘î merkūm Atami dahi meclis-i mezkûrda voyvoda-i merkūm muvâcehesinde takrîr-i kelâm edip merkūm Kostantin Voyvoda ânifen zikr olunan deyn-i merkūmu ucâleten bana edâya adem-i kudretinden nâşî isti‘câl etmeğin ben dahi meblağ-ı mezbûru işbu târih-i kitâb senesi şehr-i Rebî‘ülevveli gurresinden on ay tamâmına değin edâ ve teslîm eylemek üzere voyvoda-i merkūmu te’cîl eylediğimde ol dahi ecel-i mersûm hulûlüne değin meblağ-ı merkūmu bana edâya ta‘ahhüd ve iltizâm eyledi dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min-Saferi’l-hayr li-sene semân ve selâsîn ve mi’e ve elf. Şuhûdü’l-hâl: Ahmed Efendi b. Süleyman, Süleyman Efendi b. Osman, Molla İbrahim el-mukayyid, Ali Efendi b. Ömer Efendi, Mehmed Çelebi haffâf, Ahmed b. Mehmed, Haffâf Hüseyin Çelebi, Münadi Süleyman Çelebi, el-Hâc Mehmed b. Abdullah, Kürkcübaşı Manol, Kürkcübaşı Anaştaş, Kontantin v. Yani, Gabril v. Ferhad, Kostantin v. Praşkova.