Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 372 Hüküm no: 415 Orijinal metin no: [61a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Abdurrahim b. eş-Şeyh Mustafa Efendi’nin menzilini el-Hâc Mehmed Efendi b. eş-Şeyh Mustafa Efendi’ye sattığı Mahrûse-i Galata’da el-Hâc A‘mâ mahallesinde sâkin Molla Abdurrahin b. eş-Şeyh Mustafa Efendi nâm kimesne meclis-i şer‘de li-ebeveyn er karındaşı işbu râfi‘u’l-kitâb el-Hâc Mehmed Efendi b. eş-Şeyh Mustafa Efendi mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan cidâr-ı hısn ve bir tarafdan Ahmed Kapudan menzili ve bir tarafdan karındaşlarım müşterî-i mezbûr el-Hâc Mehmed Efendi ve sagīr Feyzullah menzilleri ve bir tarafdan ba‘zen âhar karındaşım sagīr Ali menzili ve ba‘zen tarîk-i hâss ile mahdûd ulyâda bir bâb oda ve vüstâda bir bâb oda ve tahtında bir kenîf ve bir mikdâr arsa-i hâliye ve müşterek sokak kapısını müştemil mülk menzilimi bi-cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile karındaşım mezbûr el-Hâc Mehmed Efendi’ye doksan guruşa bey‘ u teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabûl eyledikden sonra semeni olan meblağ-ı mezbûru karındaşım mezbûr el-Hâc Mehmed Efendi yedinden tamâmen ahz u kabz eyledim ba‘de’l-yevm menzil-i mahdûd-ı mezkûr bi-cemî‘i mâ yeştemilühû ve yahvîhi karındaşım mezbûr el-Hâc Mehmed Efendi’nin mülk-i müşterâsı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâdis ve’l-ışrîn min-Saferi’l-hayr sene 1138. Şuhûdü’l-hâl: Mehmed Efendi b. Feyzullah, Kasım Paşalı Mahmud Çelebi, Zihkircizâde İsmail, el-Hâc Mehmed Reis, Molla Ahmed b. Memiş, Fesci el-Hâc Mustafa, Ahmed Ağa b. Hasan, Kādızâde Salih Çelebi, el-Hâc Ahmed b. el-Hâc Osman, Kazgancı Ahmed Kapudân, Molla Ali b. Abdülkerîm, el-Hâc Süleyman b. Memiş.