Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 372 Hüküm no: 416 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Mehmed Efendi b. eş-Şeyh Mustafa Efendi’nin istiğlâl yoluyla borç para aldığı Mahrûse-i Galata’da el-Hâc A‘mâ mahallesinde sâkin el-Hâc Mehmed Efendi b. eş-Şeyh Mustafa Efendi meclis-i şer‘de mahrûse-i mezbûrede Yolcuzâde mahallesinde sâkin Solak İbrahim Ağa b. el-Hâc Mehmed Ağa b. Mustafa Ağa tarafından ikrâr-ı âti’z-zikri tasdîka vekîl olduğu Ali Çelebi b. Mehmed ve Abdullah Çelebi b. Mahmud nâm kimesneler şehâdetleriyle sâbit olan işbu râfi‘u’l-kitâb Mehmed Efendi b. el-Hâc Mustafa mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ bir tarafdan cidâr-ı hısn ve bir tarafdan Ahmed Kapudan menzili ve bir tarafdan âhar menzilim ile karındaşım sagīr Feyzullah menzili ve bir tarafdan ba‘zen âhar karındaşım sagīr Ali menzili ve ba‘zen tarîk-i hâs ile mahdûd ulyâda bir bâb oda ve vüstâda bir bâb oda ve tahtında bir kenîf ve bir mikdâr arsa-i hâliye ve müşterek sokak kapısını müştemil mülk menzilimi müvekkil-i mezbûr Mustafa Ağa’ya bi-tarîki’l-istiğlâl otuz beş guruşa bey‘ u teslîm eylediğimde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr otuz beş guruşu müvekkil-i mezbûr İbrahim Ağa yedinden tamâmen ahz u kabz eylediğimden sonra müvekkil-i mezbûr İbrahim Ağa menzil-i mahdûd-ı mezkûru ba‘de’t-tahliyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına değin beş guruş ve bir rub‘a yine bana îcâr ve teslîm eyledikde ben dahi ber-vech-i muharrer istîcâr ve kabûl eyledim dedikde vekîl-i mezbûr Mehmed Efendi mukırr-ı mezbûr el-Hâc Mehmed’i ikrâr-ı meşrûhunda vicâhen ve şifâhen tahkīk ve tasdîk etmeğin mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ ve’l-ışrîn min-Saferi’l-hayr sene 1138. Şuhûdü’l-hâl: es-Sâbikūn.