Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 373 Hüküm no: 417 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. İbrahim’in menzilini Fatıma Hatun bt. el-Hâc Mehmed’e sattığı Mahmiye-i İstanbul’da Mahmudpaşa kurbünde Dâye Hâtun mahallesinde sâkin Mustafa Ağa b. İbrahim b. Ahmed tarafından bey‘-i âti’z-zikri ikrâra vekil olduğu Mehmed Ağa b. Ahmed ve Süleyman Çelebi b. Ali nâm kimesneler şehâdetleriyle sâbit olan İbrahim Ağa b. İbrahim nâm kimesne meclis-i şer‘de işbu sâhibetü’l-kitâb Fâtıma Hâtun bt. el-Hâc Mehmed mahzarında bi’l-vekâle ikrâr ve takrîr-i kelâm edip müvekkilim mezbûr Mustafa Ağa akd-i âti’z-zikrin sudûruna değin silk-i mülkünde münselik olup mahrûse-i Galata muzâfâtından kasaba-i Fındıklı’da Selime Hâtun mahallesinde vâki‘ bir tarafdan ba‘zen Hadice Hâtun ve ba‘zen Hüseyin Çelebi mülkleri ve bir tarafdan dere ve bir tarafdan ba‘zen el-Hâc Mustafa ve ba‘zen Ali Kapudan menzilleri ve bir tarafdan tarîk-i âm ile mahdûd hâriciyesinde fevkāni beş bâb oda ve bir sofa ve dehliz ve kenîf ve tahtânî bir ahur ve bi’r-i mâ ve bir mikdâr bahçeyi ve dâhiliyesinde fevkānî iki bâb oda ve iki sofa ve dehlîz ve tahtânî iki bâb oda ve bir matbah ve kenîf ve bir mikdâr bahçeyi müştemil mülk menzilini mezbûre Fâtıma Hâtun’a tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile sekiz yüz guruşa bey‘ u temlîk ve teslîm eyledikde ol dahi ber-vech-i muharrer iştirâ ve tesellüm ve temellük ve kabûl eyledikden sonra semeni olan meblağ-ı mezbûr sekiz yüz guruşu müşteriye-i mezbûre Fâtıma Hâtun yedinden bi’t-tamâm ve’l-kemâl ahz u kabz eyledi ba‘de’l-yevm menzil-i mahdûd-ı mezkûr bi-cemî‘i mâ yeştemilühû ve yahvîhi müşteriye-i mezbûre Fâtıma Hâtun’un mülk-i müşterâsı olup müvekkil-i mezbûrun kat‘an alâka ve medhali kalmamışdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ-hüve’l-vâkı‘ bi’l-ibtigā ketb olundu. Fi’l-yevmi’s-sâmin ve’l-ışrîn min-Saferi’l-hayr sene 1138. Şuhûdü’l-hâl: Umdetü’l-huffâz Şeyhü’l-kurâ Hasan Efendi, Fahrü’l-eimme el-Hâc Ömer Efendi, es-Seyyid Süleyman Çelebi, Fahrü’l-huffâz Mehmed Efendi, Ömer Efendi el-müezzin, Yahya Efendi imâm-ı sânî, Süleyman Efendi el-müezzin, el-Hâc Mustafa b. el-Hâc Musa, el-Hâc Mustafa b. Ömer, Mehmed Efendi b. Ahmed, el-Hâc Mehmed b. Mehmed çukadâr, el-Hâc Abdurrahman b. Abdüsselâm.