Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 374 Hüküm no: 418 Orijinal metin no: [61b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasap taifesinin gerek Tersane-i amire ve gerek sair mahallerde kestikleri koyun, kuzu ve keçi başları ve ayaklarını emre mugayir satamayacakları Mahrûse-i Galata ve tevâbi‘inde vâki‘ paçacı tâifesinden işbu rafi‘u’l-vesîka kethudâları Molla Ahmed b. Mehmed ve Süleyman Beşe b. İbrahim ve Murad Beşe b. Ali nâm kimesneler ile Kiko v. Kok ve Seçor v. Kiko ve Kiko v. Tilo nâm zimmîler meclis-i şer‘de levend tâifesinden Tersane-i âmire kurbünde vâki‘Seferikoz mahallesinde çevrencilik ve çorbacılık işleyen el-Hâc Hasan b. el-Hâc Mehmed ve el-Hâc Memed b. Ahmed ve İbrahim Beşe b. Abdullah ve Ali Beşe b. Hasan vesâirleri mahzarında Tersane-i âmire kethudâsı olan emîrü’l-ümerâi’l-kirâm el-Hâc Musa Paşa tarafından mübâşir ta‘yîn olunan Hüseyin Çavuş ve Çörenciler Kethüdâsı Hasan Ağa b. Mustafa hâzır olduğu hâlde her biri üzerlerine tasvîr-i müdde‘â edip yedimizde olan hatt-ı hümâyûn-ı şevket-makrûn ile mu‘anven evâmir-i aliyye ve hücec-i şer‘iyye ve i‘lâmlar mantûkunca mahmiye-i İstanbul ve Galata ve Üsküdar ve Eyüb kazâlarında vâki‘ ser-hâneler Ayasofya-i Kebîr Vakfı’ndan olup feth-i hakānîden beri kasap tâifesinin Galata ve Tophane ve Kasımpaşa ve Tersane vesâir mahallerde zebh eyledikleri koyun ve kuzu ve keçi başları ve ayakları bizim mu‘ayyen ve mahsûs metâ‘ımız olmağla narh-ı cârî üzere bize bey‘ olunup çörenci ve çorbacı ve kıptî ve çoban tâifeleri metâ‘ımızı bey‘ u şirâdan men‘-i ekîd ile men‘ olunmuşlar iken eşhâs-ı merkūme çörencilikde dahi hâm-dest olup kat‘an alâkaları olmamağın fuzûlen Tersane-i âmire ve Seferikoz mahallesinde birer dükkan ihdâs ve metâ‘ımıza ta‘arruz etmeleriyle biz dahi eşhâs-ı merkūme ile mukaddemâ İstanbul kādısı huzûrunda murâfa‘a olunduğumuzda eşhâs-ı merkūme metâ‘ımızı bey‘ u şirâdan men‘ ve onlar dahi müdâhale eylememek üzere ta‘ahhüd ve minvâl-i muharrer üzere yedimize hüccet-i şer‘iyye ve i‘lâm verilmiş iken eşhâs-ı merkūme yine tek durmayıp 1132 senesinde kapudân-ı merkūm Süleyman Paşa gününde Tersane kasaplarından baş ve ayak almak üzere hatt-ı hümâyûn ve evâmir-i aliyyelere mugāyir hilâf-ı inhâ bir tarîkle yedlerine fermân alıp metâ‘ımıza müdâhale birle nizâmımıza [62a] halel verdiklerinden mâ‘adâ vakıf ser-hânelerin ta‘tîllerine bâ‘is ve bâdî olmalarıyla vakf-ı mezbûrun nâzırı olup ve hâlâ Dârü’s-sa‘âde ağası olan iftihârü’l-havâs ve’l-mukarrabîn semâhatlü Beşir Ağa dahi eşhâs-ı merkūmenin yedlerinde olan fermân hilaf-ı hatt-ı hümâyûn olup men‘leri her vechile elzem olduğu 1137 senesi Saferü’l-hayrında der-i Devlet-i aliyye’ye i‘lâm eyledikde kasap tâifesi zebh eyledikleri koyun ve kuzu ve keçi başları ve ayakların ihtisâb defterinde tahrîr olunan narh-ı cârî üzere paçacı tâifesine bey‘ edip min ba‘d çörenci ve çörekci ve çorbacı tâifelerine verilmek üzere tekrâren yedimize hatt-ı hümâyûn ile mu‘anven ve mü’ekked bir kıt‘a emr-i âlî inâyet ve erzân buyurulmağın nazar olunup mûcebi ile amel ile eşhâs-ı merkūmeye tenbîh olunması murâdımızdır deyü min-külli’l-vücûh takrîr-i meşrûhlarına mutâbık ve târih-i mezbûr ile müverrah ve hatt-ı şerîf ile mu‘anven bir kıt‘a emr-i âlî ısdâr eylediklerinde ba‘de’n-nazar ve’l-kırâe ve’l-istintâk eşhâs-ı merkūme cevâblarında mazmûn-ı emr-i âlîyi ikrâr ve i‘tirâf etmeğin ve kasap tâifesinin gerek Tersane-i âmire ve gerek sâir mahallerde zebh eyledikleri koyun ve kuzu ve keçi başları ve ayaklarını mukaddemâ ve hâlen verilen hatt-ı hümâyûna mugāyir bey‘ u şirâ ve dahl ü ta‘arruz eylememek üzere eşhâs-ı merkūmeye tenbîh birle mâ-hüve’l-vâkı‘ bi’l-ibtigā ketb olundu. Fi’l-yevmi’s-sâbi‘ aşer min-Saferi’l-hayr sene 1138. Şuhûdü’l-hâl: İbrahim Çelebi b. Muharrem, Halil Çelebi b. Mustafa, Mustafa b. Ahmed, Mehmed b. Ahmed, Ali b. Ahmed, Yusuf b. Abdullah, Bekir Çelebi b. Ahmed.