Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 375 Hüküm no: 419 Orijinal metin no: [62a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İpekci esnafının el-Hâc Mehmed b. Ahmed’i kethüda, Ahmed Çelebi b. Mustafa’yı yiğitbaşı ve Hasan b. Abdurrahman’ı çavuş tayin ettikleri El-emru kemâ hurrire fîhi nemakahu’l-fakīr ileyhi azze şânuhû es-Seyyid Yahya el-müvellâ hilâfeten bi-medîneti Galata -gufira lehû-. Temme’l-kelâm fî-hâze’l-makām es-Seyyid Yahya en-nâib bi-Galata sâbıkan. Mühür: Hâdim-i şer‘ Mehmed Yahya Mahrûse-i Galata’da sâkin kazzâz tâifesinin müsin ve ihtiyâr ustalarından es-Seyyid Mehmed b. es-Seyyid Mehmed ve Mustafa Çelebi b. Mehmed ve İbrahim Çelebi b. el-Hâc Mehmed ve Ahmed Çelebi b. Hasan ve İsmail Çelebi b. Ali ve Mustafa Çelebi b. Ahmed ve Hasan Çelebi b. Abdurrahman ve İsmail b. Mahmud ve İbrahim b. Kasım ve Mehmed b. Ahmed ve Hasan b. İbrahim ve Hasan b. Ömer ve Mehmed b. Mustafa nâm kimesneler vesâirleri meclis-i şer‘-i hatîr-i lâzimü’t-tevkīrde yine tâife-i merkūme ustalarından işbu râfi‘u’l-vesîka el-Hâc Mehmed b. Ahmed ve Ahmed Çelebi b. Mustafa ve Hasan b. Abdurrahman mahzarlarında her biri takrîr-i kelâm ve ta‘bîr ani’l-merâm edip mezbûr el-Hâc Mehmed beynimizde her vechile mu‘temed ve müstakīm olup cümlemiz kendüden hoşnûd ve râzî olduğumuz cihetle kethudâlığa müte‘allika olan umûrumuzu nizâmımız üzere rü’yet edip lâkin yedinde sened-i şer‘î olmamağın biz dahi cümlemizin re’y ve ittifâkıyla mezbûr el-Hâc Mehmed’i üzerimize kethudâ ve mezbûr Ahmed Çelebi’yi yiğitbaşı ve mezbûr Hasan’ı çavuş nasb ve ta‘yîn eyledik dediklerinde mezbûrûndan her biri dahi zikirleri sebk eden kethudâ ve yiğitbaşı ve çavuşluğu kabûl ve hıdemât-ı lâzimelerini mahallinde ikāmete ta‘ahhüd etmeğin işbu sahîfe-i sahîha kıbel-i şer‘den li-ecli’s-sened ketb olunup yedlerine def‘ olundu. Fî-selh-i Saferi’l-hayr li-sene semân ve selâsîn ve mi’e ve elf. Şuhûdü’l-hâl: Arusi Mustafa Efendi, Sipahi Ahmed Efendi b. Süleyman, Mustafa Efendi b. Mehmed, İbrahim Çelebi b. Muharrem, Halil Çelebi b. Mustafa, İbrahim b. Mustafa, Ali Bey b. Abdullah, Mustafa Beşe b. Receb.