Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 376 Hüküm no: 420 Orijinal metin no: [62a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kunduracı Nikola’nın oğlu Yorgi’nin Praşkova v. Nasuri’den alacak davasından men edildiği El-emru hasbemâ yahvîhi nemakahu’l-fakīr ileyhi azze şânuhû es-Seyyid Yahya el-müvellâ hilâfeten bi-medîneti Galata el-mahrûse -gufira lehû-. Cezîre-i Rodos ahâlîsinden olup Galata’da Balıkpazarı kapısı dâhilinde kunduracı olduğu hâlde altı sene mukaddem hâlik olan Nikola nâm zimmînin verâseti cezîre-i mezbûrda sâkine zevce-i metrûkesi Marya bt. Kostanti nâm Nasrâniye ile sulbî kebîr oğlu Yorgi nâm zimmîye ve sulbiye kebîre kızı Ancelon nâm Nasrâniyeye münhasıra olduğu zâhir ve mukarrer oldukdan sonra merkūm Yorgi meclis-i şer‘-i hatîr-i lâzimü’t-tevkīrde kunduracı tâifesinden işbu râfi‘u’r-rakīm Praşkova v. Nasuri nâm zimmî muvâcehesinde üzerine da‘vâ ve takrîr-i kelâm edip babam hâlik-i merkūm Nikola merkūm Praşkova ile kunduracılık san‘atında şerîkler olup babam hâlik-i merkūm hayâtında şerîk-i merkūm Praşkova’ya sermâye olmak üzere mâlından elli guruş def‘ u teslîm eylemiş idi hâlâ merkūm Praşkova’dan suâl olunup meblağ-ı mezbûr elli guruşdan bana isâbet eden hisse-i irsiyye-i şer‘iyyemi bana teslîme tenbîh olunmak matlûbumdur dedikde gıbbe’s-suâl ve akībe’l-inkâr müdde‘î-i mersûmdan ber-vech-i muharrer müdde‘âsını mübeyyine beyyine taleb olundukda ityân-ı beyyineden izhâr-ı acz edip ve tâlib-i tahlîf dahi olmamağın mûcebiyle müdde‘î-i merkūm bilâ beyyine merkūm Praşkova’ya bî-vech mu‘ârazadan men‘ birle mâ-vaka‘a bi’l-ibtigā ketb olundu Fi’l-yevmi’s-sâlis ve’l-ışrîn min-Saferi’l-hayr sene 1138. Şuhûdü’l-hâl: İbrahim Çelebi b. Muharrem, Halil Çelebi b. Mustafa, İbrahim Çelebi b. Mustafa, Mustafa Çelebi b. Ahmed, Mehmed b. Ahmed, Molla Mehmed b. Yusuf, Ali b. Abdurrahman. [Not: 62b-63a-63b-64a-64b-65a sahifeleri boştur]