Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 377 Hüküm no: 421 Orijinal metin no: [65b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum patriği tarafından küreğe konan Sakızlı Mike’nin iyi haline dair daha önce aldığı ve kaybettiği ilamın suretini talebi Devletlü ( ) fukarâya merhametlü sultânım hazretleri sağ olsun bu kulları Sakız tüccârlarından olup müddet-i medîdeden beri Galata’da sâkin ve hüsn-i hâlim ile mevsûf ve sû-i hâlim[e] dâir bir mevâd ile ithâm olunmayıp hilâf-ı şer‘-i şerîf bir dürlü vaz‘ u hareketim hilâf olmamış iken bundan akdem diyâr-ı âharda hâlik olan akrabam eytâm-ı sıgārına vasiyy-i muhtâr eylediği Galata kādısı fazîletlü efendi huzûrunda şuhûd-ı udûl ile sâbit ve yedime hüccet-i şer‘iyye verilip hâlik-i merkūmun şerîki Cani nâm zimmî ile vâki‘ olan şirket hesâbın görüp zimmetinde olan mâl-ı eytâmı mutâlebe üzere iken mücerred yetim mâlını ekl kasdıyla haber ve âgâhım yoğiken Vâlide Hânı’nda sâkin Sakızlı birkaç hevâsına tâbi‘ kimesneler ile yekdil olup o Rum patriğinden sû-i hâlimi müşârun-ileyhin gıyâbımdan bir i‘lâm etdirdib bî-günâh Tersane-i âmire’ye küreğe vaz‘ ve gadr-ı küllî etmeğle tekrâren yüzden mütecâviz Müslimîn ve zimmiyân bi’l-cümle Galata’nın ehl-i sûkı hüsn-i hâlime şehâdet ve ihbârları tescîl ve i‘lâm ve mûcebince ıtlâk olunup mesfûrlar yine tek durmayıp gıyâbımdan hîleye dâim hıyânetden hâlî olmayıp âdet-i müstemirreleri olup gadr-ı külli murâd ederek i‘lâmım zâyi‘ olmağla mesfûrların şiddetinden bir dürlü emniyetim olmamağla merhamet-i aliyyelerinden mercûdur ki hâlime merhameten Galata Mahkemesi sicillâtından zâyi‘ olan i‘lâmım ihrâc ve yedime i‘tâ olunmak bâbında fermân sultânımındır. Mikı Zımmî Galata kādısı fazîletlü efendi ne vechile zabt olunduysa i‘lâm eyleyesiz deyü buyruldu. Ma‘rûz-ı dâ‘î-i devletleridir ki Sâdır olan fermân-ı âlîlerine imtisâlen kıbel-i şer‘den Başkâtib Halil Efendi dâ‘îleri irsâl olunup ol dahi taraf-ı âlîlerinden mübâşir ta‘yîn buyurulan ( ) ağa kulları ile Galata Bezzazistanı’na varıp mukaddemâ Rum patriği tarafından küreğe vaz‘ olunan mücrim-i merkūm Sakızlı Mike zimmînin keyfiyet-i ahvâlini sikāt-ı Müslimînden istifsâr ve istihbâr eyledikde merkūm Mike kendi hâlinde ve ticâretinde olup gerek kendi milletinden ve gerek milel-i sâireden bir ferdi mürûr-ı da‘vâ ve zûr-ı şehâdet-birle hilâf-ı şer‘-i şerîf rencîde ve te‘addî ve tecâvüz eylemeyip ve bu makūle eşirrâ ile dahi görüşmeyip kendi ırzıyla mukayyed ve mu‘temed ve müstakīm olduğu ecilden mukaddemâ hâlik olan karındaşı oğlu Corci zimmî Galata’da mevcûd olan eşyâ ve zimem-i müteferrikasını taleb ve da‘vâ ve kabz ve Sakız’da sâkinler olan eytâm-ı sıgārına îsâle merkūm Mike’yi vasiyy-i muhtâr etmeğle ol dahi hâlik-i merkūmun şerîki olup derûn-ı arzuhâlde mezkûrü’l-ism olan Cani zimmînin yedinde ve zimmetinde olan yirmi kîse nükūd akçe ve tereke-i sâiresini merkūm Cani’den bi’l-vesaye da‘vâ ve hüküm ve tahsîli için tazyîk etdirdikde merkūm Cani dahi husûs-ı mezbûra binâen merkūm Mike’ye garaz edip kendüyi şer‘an bir töhmet ile ittihâma adem-i kudretinden nâşî hevâsına tâbi‘ birkaç nefer zimmîler ile hufyeten Rum patriğine varıp mücrim-i merkūm Mike hakkında yalan şâhididir ve şirret da‘vâlarda gezer deyü hilâf-ı vâki‘ verdikleri haber mücerred mâl-ı eytâmı avk u te’hîr ve ibtâl içindir mücrim-i merkūmun bu âna gelince yalan şehâdeti ve şirret-i da‘vâ vesâir tezvîrât ile ittihâm olunduğu yokdur deyü bezzâzistân-ı merkūm ile etrâfında sâkinler olan haffâf ve yorgancı ve terzi ve kahveci ve çukacı ve fesci ve kürkcü ve kapamacı ve orakcı esnâfından ve gayriden bezzâzistân-ı merkūm kethudâsı Ahmed Çelebi ve Haffâflar Kethüdâsı Mehmed Çelebi ve Kahveciler Kethüdâsı Mustafa Beşe ile sâir sin ve ihtiyâr ustalarından Haffâf el-Hâc Hüseyin ve es-Seyyid Hüseyin ve el-Hâc Ali ve el-Hâc Abdullah ve el-Hâc Ahmed ve es-Seyyid Ahmed ve el-Hâc Mustafa ve es-Seyyid Halil ve Yorgani el-Hâc Ali ve Molla Mustafa ve es-Seyyid Mehmed ve İbrahim Ağa ve Ali Ağa ve Abdurrahman Odabaşı ve Ali Odabaşı ve Cani Abdurrahman Çelebi ve İbrahim Çelebi ve Ahmed Çelebi ve Hüseyin Çelebi ve Mustafa Çelebi ve diğer İbrahim Çelebi ve diğer Hüseyin Çelebi ve Abdullah Çelebi ve Süleman Çelebi ve Mehmed Çelebi ve Hüseyin Çelebi ve Ca‘fer ve Ali ve Mustafa ve diğer Süleyman Çelebi ve Yorgani İbrahim ve Ahmed Çelebi ve Halil Çelebi ve Kahveci Ahmed ve Ali Çelebi vesâir isimleri müseccel altmış üç nefer bî-garaz Müslimîn ile Rum ve Ermeni ve Yahûdi tâifesinden yetmiş üç nefer zimmîler haber verip mücrim-i merkūm Mike’nin ıtlâkını iltimâs eylediklerini mezkûr dâ‘îleri kırk gün mukaddem mahallinde tahrîr ve tescîl-i şer‘î olunduğu huzûr-ı âlîlerine i‘lâm olundu bâkī emr hazret-i men lehü’l-emrindir. Fi’l-yevm 26 N sene 1137. El-abdü’d-dâ‘î es-Seyyid Yahya en-nâib bi-medîneti Galata. [Not: 66a boş]