Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 378 Hüküm no: 422 Orijinal metin no: [66b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstinye’de Meryemzade Abdulbâki Çelebi’nin yaptırdığı mescidin yakınında çan çalmaya başlayan Rumların men edilmeleri Kıdvetü’n-nüvvâbi’l-müteşerri‘în İstinye nâhiyesinde nâibü’ş-şer‘ olan mevlânâ ( ) zîde ilmühû tevkī‘-i refî‘-i hümâyûn vâsıl olıcak ma‘lûm ola ki İstinye nâm karyenin Müslimîn ahâlîsi ve sefâyin ashâbı südde-i sa‘âdetime arzuhâl edip Galata kazâsı muzâfâtından İstinye nâhiyesinde Tarabya nâm karyede bir tarafı mekābir-i Müslimîn ve bir tarafı leb-i deryâ ve iki cânibi tarîk-i âm ve bir mevzı‘ında Meryemzâde Abdulbâki Çelebi nâm sâhibü’l-hayr lillâh bir mescid-i şerîf binâ edip ahd-i karîbe değin cemâ‘at-i Müslimîn derûnunda râhat ile edâ-i salât ederler iken yine karye-i mezbûrede dört beş sene mukaddem ihdâs olunan Rum keferesi âyin-i bâtılaları icrâ vaktinde çan çalmalarıyla cemâ‘at-i Müslimîn mescid-i mezbûr derûnunda vakt-i salâtda bî-huzûr olundukların bildirüb fîmâ ba‘d çan çalınmayıp i‘lân-ı küfr olunmamak üzere mesfûrlara tenbîh-i ekîd olunup kadîme mugāyir hareket-i şenî‘a men‘ u def‘ olunmak bâbında emr-i şerîf ricâ vürûd eden fermân-ı âlîye imtisâlen husûs-ı mezbûr mübâşir ta‘yîn olan Abdi Çavuş ma‘rifetiyle vukūf-ı tâmmı olan Müslimînden istifsâr ve istihbâr olundukda karye-i mezbûrede vâki‘ kenîsede o ana gelince çan çalındığı olmayıp lâkin karye-i mezbûre zimmîleri kenîse-i mezbûrede eyyâm-ı mahsûsalarında kadîmden beri yalnız tahta darb edegeldiklerin karye-i mezbûrede İmâm el-Hâc Ahmed Efendi ve Berber Mehmed ve Ömer Beşe ve Yeniköy’den Korucu İbrahim Beşe ve Uzun Halil ve Mehmed Çelebi ve Ahmed Çelebi ve Beykoz’da Osman Odabaşı ve Süleyman Beşe ve İbrahim b. Hasan ve Büyükdere’de Mustafa Odabaşı ve Hasan Bey ve Mustafa Çelebi ve diğer Mustafa ve Şa‘ban nâm kimesneler ekser ezmânda karye-i mezbûre önünde mürûr u ubûr eden mazbûtü’l-esâmî kimesneler bâlâda tahrîr olunan husûs-ı keyfiyet-i muharrereyi haber verdiklerin kıdvetü’n-nüvvâbi’l-müteşerri‘în İstinye nâhiyesi [nâibi] mevlânâ Ali zîde ilmuhû i‘lâm etmeğin i‘lâmı mûcebince kadîme mugāyir te‘addîleri men‘ u def‘ olunmak emrim olmuşdur buyurdum ki Vusûl buldukda bu bâbda sâdır olan emrim üzere amel dahi vech-i meşrûh üzere fîmâ ba‘d kadîme mugāyir çan çalınmayıp ol vechile i‘lân-ı kefere etmemek üzere mesfûrlara muhkem tenbîh ve te’kîd eyleyip kadîme mugāyir hareket-i şenî‘aları men‘ u def‘ eyleyesiz şöyle bilesiz alâmet-i şerîfe i‘timâd kılasız. Tahrîren fî-evâil-i Zilhicce sene 1137. Be-makām-ı Kostantıniyyeti’l-mahrûse.