Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 379 Hüküm no: 423 Orijinal metin no: [67a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul, Galata, Hasköy ve Üsküdar’da 1138 senesi lağımcı bedelini toplamada Tersane-i amire Emini Mehmed’e yardımcı olunması Akzā kuzāti’l-Müslimîn evlâ vülâti’l-muvahhidîn me‘âdini’l-fezâil ve’l-yakīn râfi‘û a‘lâmi’ş-şerîfe ve’d-dîn vârisû ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în İstanbul ve Galata ve Hâslar ve Üsküdar kādıları -zîdet fedāiluhum- tevkī‘-i refî‘i hümâyûn vâsıl olıcak ma‘lûm ola ki 1138 senesine mahsûb olmak üzere senevî iki yük seksen sekiz bin dört yüz seksen akçe mâlı olan İstanbul ve Galata ve Hasköy ve Üsküdar bedel-i lağım mukāta‘ası Tersane-i âmire’m ocaklığından olup sene-i mezbûre deruhde ve tahsîliʼçün defteri verilmek bâbında Tersane-i âmire’m emîni kıdvetü’l-emâcid ve’l-a‘yân Mehmed -zîde mecduhû- istid‘â-yı inâyet etmeğin hazîne-i âmiremde mahfûz olan başmuhâsebe defterlerine nazar olundukda İstanbul ve Galata ve Hâslar ve Üsküdar bedel-i lağım mukāta‘asının senevî iki yük seksen sekiz bin dört yüz seksen akçe mâlı ve 1137 senesi Tersane-i âmire’m emîni mûmâ-ileyh deruhde ve tahsîliʼçün emr ve defteri verildiği mukayyed bulunmağın 1138 senesi dahi emîn-i mûmâ-ileyhe deruhde ve tahsîliʼçün hazîne-i âmiremde mühürlü ve imzâlı sûret-i defter verilmeğle mûcebiyle cem‘ u tahsîl etdirilmek bâbında fermân-ı âlîşânım sâdır olmuşdur buyurdum ki hükm-i şerîfim vardıkda bu bâbda sâdır olan emrim üzere amel edip dahi zikr olunan kazâların [1]138 senesi bedel-i lağımları maktū‘unu emîn-i mûmâ-ileyhin yedine verilen memhûr ve mümzâ sûret-i defter mûcebince yerli yerinden cem‘ u tahsîl ve ahz u kabz etdirdib hilâf-ı emr ve defter kimesneye te‘allül ve nizâ‘ ve muhâlefet etdirmeyip ve senesi âharında hesâbın görüp ibrâ-yı zimmet eyeye[sin]şöyle bilesin alâmet-i şerîfe i‘t-timâd kılasız. Tahrîren fî-Zilhicce sene 1137. Be-makām-ı Kostantıniyye.