Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 380 Hüküm no: 424 Orijinal metin no: [67a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karaköy Hamamı yakınındaki bakkallardan Dimitri’nin diğer Dimitri’den şikâyetinin men edildiği Galata kādısı fazîletli efendi hilâf-ı şer‘ ve mugāyir-i nimâz değil ise te‘addî olunmaya deyü buyruldu. Devletlü merhametlü sultânım hazretleri sağ olsun. Bu kulları Galata’da Sandıkcılar içinde beş altı senedir ki nân-ı azîz fürûht ederim bir kimesneye gadr-ı şer‘iyyem yoğiken ashâb-ı a‘râzdan ba‘zı kimesneler mâni‘ olurlar merâhim-i aliyyelerinden mercûdur ki kadîmî üzere nân-ı azîz fürûht etmek üzere bir kimesne mâni‘ olmamak üzere fermân sultânımındır. Bende Dimitri zimmî İ‘lâmı mûcebince mu‘ârazadan men‘ olunmak buyruldu. Ma‘rûz-ı dâ‘î-i devletleridir ki Galata’da Karaköy Hamamı kurbünde bakkal olan sâhib-i arzuhâl Dimitri yine hamâm-ı mezbûra muttasıl bakkal dükkânı olan diğer Dimitri ile terâfu‘ edip beş seneden beri ben Kurşunlu Mahzen Fırını demeğle ma‘rûf habbâz fırınından benim bakkal dükkânıma nân-ı azîz irsâl olunub fürûht olunurken hâlâ fırın-ı mezbûrun ustası benim dükkânıma irsâl etmeyip merkūm diğer Dimitri’nin bakkal dükkânına irsâl ve merkūm diğer Dimitri fürûht eder deyü da‘vâ ve merkūm diğer Dimitri fırın-ı mezbûrdan dükkânına nân-ı azîz irsâl olunduğunu ikrâr lâkin benim dükkânım kadîmden fırın-ı mezbûrun mu‘ayyen ve mahsûs iskemlesidir deyü iddi‘â ve tâife-i mezbûrenin Galata ihtisâbında mazbût olup üzeri musahhah fermân-ı âlî ile mu‘anven nizâm defterlerine nazar olundukda merkūm diğer Dimitri’nin bakkal dükkânı fırın-ı mezbûrun kadîmden mu‘ayyen ve mahsûs iskemlesi olduğu mastûr ve mukayyed olup ve sâhib-i arzuhâlin dükkânında nân-ı azîz fürûht etmesi muhdes olduğundan mâ‘adâ fermân-ı âlî ile memnû‘ ve nizâm-ı kadîmlerine mugāyir olduğu zâhir olmağın sâhib-i arzuhâl Dimitri merkūm diğer Dimitri’ye bî-vech mu‘ârazadan men‘ olunduğu huzûr-ı âlîlerine i‘lâm olundu. Fermân men lehü’l-emrindir.