Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 381 Hüküm no: 425 Orijinal metin no: [67b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hazine-i amireden Marmara ve Kapıdağı nahiyelerine gönderilen mübaşire defterde yazıldığı gibi bedel-i nüzullerin tahsilinde yardımcı olunması Akzā kuzāti’l-Müslimîn evlâ vülâti’l-muvahhidîn ma‘deni’l-fasl ve’l-yakīn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘în mevlânâ Galata kādısı -zîdet fezāiluhû- ve kıdvetü’n-nüvvâbi’l-müteşerri‘în Marmara ve Kapudağı nâhiyeleri nâibleri -zîde ilmuhumâ- tevkī‘-i refî‘i hümâyûn vâsıl olucak ma‘lûm ola ki Hazîne-i âmirem defterleri mûcebince Galata kazāsına tâbi‘ Marmara nâhiyesinin yirmi iki ve bir sülüs ve Kapıdağı nâhiyesi Müslimanâtı üzerlerinde yüz otuz sekiz buçuk hâne ki mecmû‘u yüz altmış buçuk ve bir sülüs bedel-i nüzûl hâneleri olup Tersane-i âmirem ocaklığı olmağla bin yüz otuz sekiz senesine mahsub olmak üzere cem‘ u tahsîli lâzım gelmeğin ( ) deruhde olunup yedinde mühürlü ve nişânlı defteri sûreti verilmeğin mûcebince cem‘ u tahsîl etdirilmek fermân olmuşdur buyurdum ki hükm-i şerîfimle mübâşir-i mezbûr vardıkda bu bâbda sâdır olan emrim üzere amel edip dahi zikr olunan nâhiyelerin ol mikdâr bedel-i nüzûl hâneleri olup târih-i mezbûra mahsûb olmak üzere her bir hânelerinden altışar yüz akçe bedel-i nüzûllerin irsâl olunan mühürlü ve nişânlı mevkūfât defteri sûreti mûcebince vakt ü zamânıyla cem‘ u tahsîl ve teslîm-i Tersane-i âmirem etdirdüb hilâf-ı emr ü defter bir ferde te‘allül ve muhâlefet etdirmeyesin ve bundan mâ‘adâ mübâşir-i mezbûrun cihet-i ma‘âşıʼçün her bir hânelerinden otuzar akçe dahi aldırıp ziyâde aldırmayasın ve bedel-i nüzûl için alınan akçenin her yüz on akçesinden bir esedî guruş hesâbınca hîn-i tahsîlde alınan akçeyi Hazîne-i âmirem alındığı vech üzere aldırıp ziyâde ve noksân alınmaya ve aldırmayasın kesr-i defterden ve ve noksân hâneden ve fermândan ziyâde talebiyle zulm ü te‘addîden be-gāyet ihrâz eyleyesin şöyle bilesin alâmet-i şerîfe i‘timâd kılasın. Tahrîren fî 5 Zilhicce sene 1137. Kostantıniyyeti’l-mahrûsa.