Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 381 Hüküm no: 426 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hazine-i amireden Marmara ve Kapıdağı nahiyelerine gönderilen mübaşire defterde yazıldığı gibi 1138 senesi bedel-i nüzullerin tahsilinde yardımcı olunması Akzā kuzāti’l-Müslimîn evlâ vülâti’l-muvahhidîn ma‘denü’l-fazl ve’l-yakīn vârisü ulûmi’l-enbiyâ-i ve’l-mürselîn el-muhtassu bi-mezîdi inâyeti’l-meliki’l-mu‘în mevlânâ Galata kādısı -zîde fezāiluhû- ve kıdvetü’n-nüvvâbi’l-müteşerri‘în Marmara ve Kapudağı nâhiyeleri nâibleri -zîde ilmuhumâ- tevkī‘-i refî‘-i hümâyûn vâsıl olıcak ma‘lûm ola ki Hazîne-i âmirem defterleri mûcebince nefs-i şehr-i Galata’nın iki yüz doksan beş ve Marmara nâhiyesinin yirmi iki ve bir sülüs ve Kapudağı nâhiyesinin otuz yedi ve bir rub‘ cem‘an zikr olunan şehir ve nâhiyelerin üç yüz elli dört ve bir sülüs ve bir rub‘ avârız-hâneleri Tersane-i âmirem ocaklığı olmağla 1138 senesine mahsûb olmak üzere cem‘ u tahsîli lâzım gelmeğin deruhde olunup yedine mühürlü ve nişânlı mevkūfât defteri sûreti verilmeğin mûcebince cem‘ u tahsîl etdirilmek fermânım olmuşdur buyurdum ki hükm-i şerîfimle mübâşir-i mezbûr vardıkda bu bâbda sâdır olan emrim üzere amel edip dahi zikr olunan şehir ve nâhiyelerin ol mikdâr avârız-hâneleri olup târih-i mezbûra mahsûb olmak üzere her bir hânelerden dörder yüz yirmi dokuzar akçe avârızları irsâl olunan mühürlü ve nişânlı mevkūfât defteri sûreti mûcebince yerli yerinden cem‘ u tahsîl ve teslîm-i Tersane-i âmirem etdirdib hilâf-ı emr u defter bir ferde te‘allül ve muhâlefet etdirmeyesin ve bundan mâ‘adâ mübâşir-i mezbûrun cihet-i ma‘âyişiʼçün her bir hânesinden ellişer akçe dahi aldırıp ziyâde aldırmayasız ve avârız için alınan akçenin her yüz sekiz bir esedi guruş hesâbınca hîn-i tahsîlde mîrî için alınan akçeyi Hazîne-i âmirem alındığı vech üzere aldırıp ziyâde ve noksân alınmaya ve aldırmayasız kesr-i defterden ve noksân hâneden ve fermanımdan ziyâde talebiyle zulm ü te‘addîden be-gāyet ihrâz eyleyesiz şöyle bilesin alâmet-i şerîfe i‘timâd kılasız. Tahrîren fî 5 Zilhicce sene 1137. Be-makām-ı Kostatıniyyeti’l-mahrûse.