Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 382 Hüküm no: 427 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasapların selhhane hakkındaki nizama uygun hareket etmeleri, Yahudi kasapların da rastgele yerlerde hayvan kesmemeleri Kıdvetü’l-emâcid ve’l-a‘yân Galata voyvodası ( ) zîde mecduhû tevkī‘-i refî‘-i hümâyûn vâsıl olıcak ma‘lûm ola ki kıdvetü’l-emâcid ve’l-a‘yân Hâssa Kasapbaşı el-Hâc Osman b. Mehmed -zîde mecdühû- Dîvân-ı hümâyûn’uma arzuhâl edip Ortaköy nâm karyede müceddeden binâ olunan Câmi‘-i Cedîd Evkāfı musakkafâtından Ortaköy’de binâ olunan Yahûdi kasabları selhhânesine Galata’da evvelâ Yahûdi kasabı mutasarrıf oldukları kasablık gedik hisseleri ma‘a gediklerine selhhâne-i mezbûre gedik olmak şartıyla almak ve Galata kādısı i‘lâmıyla verilen fermân-ı âlîşân Anadolu muhâsebesine kayd ve ünvânına hatt-ı hümâyûn-ı şevket-makrûn keşîde kılınıp hilâf-ı şart-ı vâkıf ve mugāyir-i fermân-ı âlîşân Yahûdi kasablarından Morkato nâm Yahûdi Tophâne’de ve Kasımpaşa’da sığır zebh ve gedik olan dükkânlara gönderip selhhâne-i mezkûrun ibtâline bâ‘is ve vakf-ı şerîfe gadr etmeğle mesfûr Yahûdi selhhâne-i mezkûrede zebh edip gayr-i mahalde zebh etmemek üzere Ortaköy selhhânesine nakl olunmak ricâ etmeleriyle Hazîne-i âmiremde mahfûz olan Anadolu muhâsebesi defterine nazar olundukda mahrûse-i Galata’ya tâbi‘ Ortaköy kapısında sâkin Yahûdi tâifesinin kadîmden beri gediği olu[b] sığır ve koyun ve kuzu ve keçi kasapları olup lâkin mahsûs selhhâneleri olmadığı ecilden karye-i merkūmede müceddeden bir selhhâne binâ olunması mühim ve muktazî olmağla karye-i mezbûre sükkânı için iktizâ eden ganem ve bakar karye-i merkūmede ihyâ olunan câmi‘-i şerîf vakfı musakkafâtından olmak üzere müceddeden binâ olunan selhhânenin zebh olunan Beşiktaş Selhhânesi’nden et nakil olunmaya deyü bundan akdem sâdır olan fermân-ı âlîşân mûcebince müste’cirlerin yedlerine taraf-ı vakıfdan verilen temessük mantûkunca lâzım gelen icâreteyn beher şehr taraf-ı vakfa edâ olunup vakf-ı merkūmun selhhânesinden kadîmî üzere tâife-i Yehûd için kifâyet mikdârı sığır ve koyun ve kuzu ve keçi zebh ve kadîmden dükkânları olan Galata dâhilinde Karaköy kurbünde üç aded ve yine Galata’da Eğrikapı hâricinde bir aded ve Ortaköy’de dört aded ve Kuruçeşme’de bir aded ve Kuzguncuk’da bir aded ki cem‘an zikr olunan mahallerde on aded kasap dükkanlara bey‘ ve sayf ve şitâda ve vakt-i zarûretde muzâyaka çekdirilmemek üzere mahalline kayd ve nizâm verilmeğe muhtâc olduğu Galata Kādısı mevlânâ İbrahim-zîdet fezâiluhû- arz ve sâdır olan fermân-ı âlîşânım mûcebince vech-i meşrûh ve şurût-ı mezkûr üzere nizâm verilmeğle mahalline kayd olunup emr-i celîlü’ş-şânım vermek üzere dergâh-ı mu‘allâm Yeniçeri Ağası Mehmed dahi i‘lâm etmeğle i‘lâmı mûcebince 1134 senesi Cumâdelûlâsının 23 günü emr-i şerîfim verildiği ve verilen emr-i şerîfimin ünvânına mûcebince amel oluna deyü hatt-ı hümâyûn-ı şevket-makrûn keşîde kılındığı derkenar ve arz olundukda imdi derkenarda zikr u tasrîh olunan mahallerde zebh olunan hilâf-ı hatt-ı hümâyûn ve mugāyir-i emr-i âlîşân mesfûr men‘ u def‘ oluna deyü fermân-ı âlîşânım sâdır olmuşdur buyurdum ki hükm-i şerîfim vardıkda bu bâbda sâdır olan emrim üzere amel edip dahi vech-i meşrûh üzere mukaddemâ verilen emr-i âlîşân mûcebince zikr olunan mahallerde zebh etdirdip hilâf-ı emr-i hümâyûn hareket eden mesfûrları men‘ u def‘ eyleyesin şöyle bilesin alâmet-i şerîfe i‘timâd kılasın. Tahrîren fî-gurre-i Zilhicce sene 1137. Kostantıniyyeti’l-mahrûse.