Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 383 Hüküm no: 428 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İngiltere Elçisi Abraham Astanyan’ın satın aldığı 4000 müdre şarabın bir defalığına evine teslimine müsaade edilmesi İftihârü’l-ümerâi’l-ekâbir müstecmi‘u cemî‘i’l-me‘âlî ve’l-mefâhir el-muhtassu bi-mezîdi inâyeti’l-meliki’l-kādir bi’l-fi‘il dergâh-ı mu‘allâm yeniçerileri ağası olan ( ) ağa -dâme ulüvvuhû- ve iftihârü’l-emâcid ve’l-ekârim câmi‘u’l-mehâmid ve’l-mekârim el-muhtassu bi-mezîdi inâyeti’l-meliki’d-dâim Hâssa bostancıbaşı olan ( ) -dâme mecduhû- tevkī‘-i refî‘i hümâyûn vâsıl olıcak ma‘lûm ola ki kıdvetü ümerâi’l-milleti’l-mesîhiyye Âsitâne-i sa‘âdetimde mukīm İngiltere Elçisi Abraham Astanyan -hutimet avâkibuhû bi’l-hayr- südde-i sa‘âdetime arzuhâl gönderip İngiltere bâzergânlarının kifâf-ı nefsleriʼçün senede bir def‘a 4000 müdre hamra emr-i şerîf verile gelip lâkin 1135 senesiʼçün henüz emr-i şerîf verilmemeğle sene-i merkūmeye mahsûb olup beher müdresi onar vakiyye olmak üzere İstanbul’a karîb iskele ve yalılardan akçeleriyle iştirâ eyledikleri yalnız dört bin medre hamrın evlerine nakline mümâna‘at olunmayıp ve zâbitlerden ve âhardan harc ve avâyid nâmıyla akçe mutâlebesiyle te‘addî olunmamak bâbında emr-i şerîfim ricâ etmeğin ahkâm kaydına mürâca‘at olundukda vech-i meşrûh üzere emr-i şerîf verilegeldiği mastûr ve mukayyed bulunmağın def‘a-i vâhidede cümlesi hânelerine nakl ve teslîm etdirilmemek [etdirilmek] bâbında fermân-ı âlîşânım sâdır olmuşdur buyurdum ki vusûl buldukda bu bâbda sâdır olan fermân-ı celîlü’l-kadrim mûcebince amel dahi vech-i meşrûh üzere sene-i merkūmeye mahsub olur beher müdresi onar vakiyye olmak üzere İstanbul’a karîb iskele ve yalılardan akçeleriyle iştirâ eyledikleri yalnız dört bin müdre hamrın cümlesi def‘a-i vâhidede hânelerine nakl ve teslîm etdirilip ve zâbitlerden ve âhardan harc ve avâyid nâmıyla akçe mutâlebesiyle rencîde ve te‘addî etdürmeyesiz ammâ mukayyed olasız ki mikdâr-ı mu‘ayyeneden ziyâde olunmak ihtimâli olmaya şöyle bilesiz alâmet-i şerîfe i‘timâd kılasız. Tahrîren fî-evâhir-i Şevvâl sene 1137. Be-makām-ı Kostantıniyyeti’l-mahrûse.