Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 384 Hüküm no: 429 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İngiltere Elçisi Abraham Astanyan’ın satın aldığı yedi bin müdre şarabın bir defalığına evine teslimine müsaade edilmesi İftihârü’l-ümerâi’l-ekâbir müstecmi‘u cemî‘i’l-me‘âlî ve’l-mefâhir el-muhtassu bi-mezîdi inâyeti’l-meliki’l-kādir dergâh-ı mu‘allâm yeniçerileri ağası olan ( ) ağa -dâme ulüvvuhû- ve iftihârü’l-emâcid ve’l-ekârim câmi‘u’l-mehâmid ve’l-mekârim el-muhtassu bi-mezîdi inâyeti’l-meliki’d-dâim Hâssa bostancıbaşı olan ( ) -dâme mecduhû- tevkī‘-i refî‘i hümâyûn vâsıl olıcak ma‘lûm ola ki kıdvetü ümerâi’l-milleti’l-mesîhiyye Asitâne-i sa‘âdetimde mukīm İngiltere Elçisi olan Abraham Astanyan -hutimet avâkibuhû bi’l-hayr- südde-i sa‘âdetime arzuhâl gönderip İngiltere elçisinin ve âdemlerinin kifâf-ı nefsleriʼçün senede bir def‘a yedi bin müdre hamra emr-i şerîf verilegelip lâkin 1135 senesiʼçün henüz emr-i şerîf verilmemeğle sene-i mezbûra mahsûb olup beher müdresi onar vakiyye olmak üzere İstanbul’a karîb iskele ve yalılardan akçeleriyle iştirâ eyledikleri yalnız yedi bin müdre hamrın evine nakline mümâna‘at olunmayıp ve zâbitlerden ve âhardan harc ve avâyid nâmıyla akçe mutâlebesiyle te‘addî olunmamak bâbında emr-i şerîfim ricâ etmeğin ahkâm kaydına mürâca‘at olundukda vech-i meşrûh üzere emr-i şerîf verilegeldiği mastûr ve mukayyed bulunmağın def‘a-i vâhidede cümlesi hânelerine nakl ve teslîm etdirilmemek [etdirilmek] bâbında fermân-ı âlîşânım sâdır olmuşdur buyurdum ki vusûl buldukda bu bâbda sâdır olan fermân-ı celîlü’l-kadrim mûcebince dahi vech-i meşrûh üzere sene-i merkūmeye mahsûb olup beher müdresi onar vakiyye olmak üzere elçi-i mûmâ-ileyhin İstanbul’a karîb iskele ve yalılardan akçesiyle iştirâ eylediği yalnız yedi bin müdre hamrın cümlesi def‘a-i vâhide hânesine nakl ve teslîm etdirilip ve zâbitlerden ve âhardan harc ve avâyid nâmıyla akçe mutâlebesiyle rencîde ve remîde etdürmeyesiz ammâ <> bu takrîb ile mikdâr-ı mu‘ayyeneden ziyâde dahl ü ta‘arruz ihtimâli olmaya şöyle bilesiz alâmet-i şerîfe i‘timâd kılasız. Tahrîren fî-evâhir-i Şevvâl sene 1137. Be-makām-ı Kostantıniyye.