Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 385 Hüküm no: 430 Orijinal metin no: [68b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İngiltere Elçisi Abraham Astanyan ile İngiliz tüccarlarının satın aldığı on bir bin müdre şarabın bir defalığına evine teslimine müsaade edilmesi Mahrûse-i Galata hâricinde mütemekkin İngiltere Elçisi Abraham Astanyan ile İngiliz tüccâranından ma‘lûmü’l-esâmî ve mahsûrü’l-eşhâs müste’menler taraflarından ikrâr-ı câi’z-zikre sâbitü’l-vekâle vekîlleri olanTercümân Diyop v. Asva nâm meclis-i şer‘de hâlâ Astane-i sa‘âdetde bi’l-fi‘il yeniçeri ağası olan umdetü’l-emâcid ve’l-ekârim izzetlü Hasan Ağa tarafından husûs-ı âti’l-beyâna mübâşir ta‘yîn olunan Çukadâr Hasan Beşe b. Mustafa ve südde-i seniyyeye bi’l-fi‘il bostâncıbaşı olan kıdvetü’l-havâs ve’l-mukarrabîn izzetlü Mustafa Ağa tarafından kezâlik mübâşir ta‘yîn olunan Ömer Haseki b. Mehmed mahzarlarında bi’l-vekâle ikrâr ve takrîr-i kelâm edip ağayân-ı müşârun-ileyhimâ hazerâtına hitâben sâdır olan işbu iki kıt‘a fermân-ı âlîşânda elçi-i merkūm ve âdemlerinin kifâf-ı nefsleriʼçün yedi bin müdre ve tüccârlarının dört bin müdre ki mu‘tâd üzere İstanbul’a karîb iskele ve yalılardan 1135 senesine mahsûben akçeleriyle iştirâ eyledikleri beher müdresi onar vakiyye olmak üzere cem‘an on bir bin müdre hamrlarını bu tarafda mahzenlerine nakl eylediklerinde re‘âyâ-yı müşârun-ileyhimâ vesâir ümenâ ve ehl-i örf taraflarından harc ve resm ve avâyid nâmıyla ve tekâlîf-i sâire talebiyle bir ferd dahl u ta‘arruz etdirilmeye deyü mastûr ve mukayyed bulunmağın müste’menûn-ı merkūmûn ber-mûceb-i fermân-ı âlî sene-i merkūmeye mahsûben verilmemeğle bakāyâ kalan on bir bin müdre hamrlarını akçeleriyle iştirâ ve bu tarafda mahzenlerine nakl ve vaz‘ eylediklerinde ağayân-ı müşârun-ileyhimâ vesâir ümenâ ve ehl-i örf taraflarından harc ve avâyid ve tekâlîf-i sâire talebiyle bir ferde dahl ü ta‘arruz eylememişdir dedikde gıbbe’t-tasdîki’l-mu‘teber mâ-vaka‘a bi’l-ibtigā ketb olundu. Fî-evâsıt-ı Zilka‘de sene 1137. Şuhûdü’l-hâl: Bekir b. Ahmed, Mehmed b. Ahmed, Süleyman b. Ahmed, İbrahim b. Mustafa, Yusuf b. Abdullah, Baba Yusuf b. Abdullah.