Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 386 Hüküm no: 432 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fransa beyzâdelerinden Can Batista Kadro’nun 1136 senesi için satın aldığı üç bin müdre şarabın bir defalığına evine teslimine müsaade edilmesi İftihârü’l-ümerâ ve’l-ekâbir müstecmi‘u cemî‘i’l-me‘âlî ve’l-mefâhir el-muhtassu bi-mezîdi inâyeti’l-meliki’d-dâim dergâh-ı mu‘allâm yeniçerileri ağası olan ( ) -dâme ulüvvuhû- ve iftihârü’l-emâcid ve’l-ekârim câmi‘u’l-mehâmid ve’l-mekârim el-muhtassu bi-mezîdi inâyeti’l-meliki’l-kādir hâssa bostancıbaşı ( ) -dâme mecduhû- tevkī‘-i refî‘i hümâyûn vâsıl olıcak ma‘lûm ola ki France pâdişâhının Âstâne-i sa‘âdetimde mukīm olan elçisi kıdvetü’l-ümerâi’l-mesîhiyye Markiz De Bonak -hutimet avâkibuhû bi’l-hayr- südde-i sa‘âdetime arzuhâl gönderip France beyzâdelerinden Can Batista Kadro nâm beyzâde ve âdemlerinin kifâf-ı nefsleriʼçün senede üç bin medre hamra emr-i şerîf verilegelmeğle işbu 1136 senesinde dahi beher müdresi onar vakiyye olmak üzere İstanbul’a karîb iskele ve yalılardan akçesiyle iştirâ eylediği üç bin müdre hamrın Galata’da hânesine nakline mümâna‘at olunmayıp zâbitlerden ve âhardan harc ve avâyid nâmıyla akçe mutâlebesiyle rencîde ve remîde etdirilmemek bâbında hükm-i hümâyûnum ricâ ve dîvân-ı hümâyûnumda mahfûz olan kuyûd-ı ahkâma mürâca‘at olundukda vech-i meşrûh üzere emr-i şerîf verilegeldiği mastûr ve mukayyed bulunmağın mukaddemâ verilegelen emr-i şerîf mûcebince nakline mümâna‘at olunmamak bâbında fermân-ı âlîşânım sâdır olmuşdur buyurdum ki vusûl buldukda bu bâbda sâdır olan fermân-ı celîlü’l-kadrim mûcebince amel dahi vech-i muharrer üzere sene-i mezbûrede beher müdresi onar vakiyye olmak üzere İstanbul’a karîb iskele ve yalılardan iştirâ eylediği üç bin müdre hamrın Galata’da hânesine nakline mümâna‘at etdürülmeyip ve Galata voyvodası ve ümenâ ve zâbitler tarafından min-ba‘d gümrük ve bâc ve avâyid ve harc nâmıyla vesâir bahâne ile akçe mütâlebesiyle rencîde ve remîde etdirmeyesiz ammâ mukayyed olasız ki mikdâr-ı mu‘ayyeneden ziyâde ve senede iki def‘a alınmak ihtimâli olmaya şöyle bilesiz alâmet-i şerîfe i‘timâd kılasız. Tahrîren fî-evâil-i Zilhicceti’ş-şerîfe sene 1137. Be-makām-ı Kostantıniyye.