Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 388 Hüküm no: 434 Orijinal metin no: [69a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fransa beyzadelerinden Cozov’un 1136 senesi için satın aldığı bin müdre şarabın bir defalığına evine teslimine müsaade edilmesi İftihârü’l-ümerâ ve’l-ekâbir müstecmi‘u cemî‘i’l-me‘âlî ve’l-mefâhir el-muhtassu bi-mezîdi inâyeti’l-meliki’l-kādir dergâh-ı mu‘allâm yeniçerileri ağası olan ( ) ağa -dâme ulüvvuhû- ve iftihârü’l-emâcid ve’l-ekârim câmi‘u’l-mehâmid ve’l-mekârim el-muhtassu bi-mezîdi inâyeti’l-meliki’d-dâim hâssa bostancıbaşı olan ( ) -dâme mecduhû- tevkī‘-i refî‘i hümâyûn vâsıl olıcak ma‘lûm ola ki France pâdişâhının Âstâne-i sa‘âdetimde mukīm olan elçisi kıdvetü ümerâi’l-milleti’l-mesîhiyye Markiz De Bonak -hutimet avâkibuhû bi’l-hayr- südde-i sa‘âdetime arzuhâl gönderip France beyzâdelerinden Cozov nâm beyzâde ve âdemlerinin kifâf-ı nefsleriʼçün senede bir def‘a bin medre hamra emr-i şerîf verilegelmeğle işbu 1136 senesinde dahi beher müdresi onar vakiyye olmak üzere İstanbul’a karîb iskele ve yalılardan [69b] akçesiyle iştirâ eylediği bin müdre hamrın Galata’da hânesine nakline mümâna‘at olunmayıp zâbitlerden ve âhardan harc ve avâyid nâmıyla akçe mutâlebesiyle rencîde etdirilmemek bâbında hükm-i hümâyûnum ricâ ve dîvân-ı hümâyûnda mahfûz olan kuyûd-ı ahkâma mürâca‘at olundukda vech-i meşrûh üzere emr-i şerîf verilegeldiği mastûr ve mukayyed bulunmağın verilegelen emr-i şerîf mûcebince nakline mümâna‘at olunmamak bâbında fermân-ı âlîşânım sâdır olmuşdur buyurdum ki vusûl buldukda bu bâbda sâdır olan fermân-ı celîlü’l-kadrim mûcebince amel dahi vech-i meşrûh üzere sene-i merkūmede beher müdre onar vakiyye olmak üzere İstanbul’a karîb iskele ve yalılardan akçesiyle iştirâ eylediği bin müdre hamrın Galata’da hânesine nakline mümâna‘at olunmayıp ve Galata voyvodası ve ümenâ ve zâbitler tarafından min-ba‘d gümrük ve bâc ve avâyid nâmıyla vesâir bahâne ile akçe mütâlebesiyle rencîde etdirmeyesiz ammâ mukayyed olasız ki mikdâr-ı mu‘ayyeneden ziyâde ve senede iki def‘a alınmak ihtimâli olmaya şöyle bilesiz alâmet-i şerîfe i‘timâd kılasız. Fi’t-târihi’l-mezbûr. Be-makām-ı Kostantıniyye.