Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 389 Hüküm no: 435 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fransa elçisinin beş tercüman ve adamlarına 1136 senesi için satın aldığı beş bin müdre şarabın bir defalığına evine teslimine müsaade edilmesi İftihârü’l-ümerâ ve’l-ekâbir müstecmi‘u cemî‘i’l-me‘âlî ve’l-mefâhir el-muhtassu bi-mezîdi inâyeti’l-meliki’l-kādir dergâh-ı mu‘allâm yeniçerileri ağası olan ( ) ağa- dâme ulüvvuhû- ve iftihârü’l-emâcid ve’l-ekârim câmi‘u’l-mehâmid ve’l-mekârim Hâssa bostancıbaşı olan ( ) -dâme mecduhû- tevkī‘-i refî‘i hümâyûn vâsıl olıcak ma‘lûm ola ki France pâdişâhının Âstâne-i sa‘âdetimde mukīm olan elçisi kıdvetü’l-ümerâi’l-milleti’l-mesîhiyye Markiz De Bonak -hutimet avâkibuhû bi’l-hayr- südde-i sa‘âdetime arzuhâl gönderip elçi-i mûmâ-ileyhin hizmetinde olan beş nefer tercümân ve âdemlerinin kifâf-ı nefsleriʼçün senede bir def‘a beş bin medre hamra emr-i şerîf verilegelmeğle işbu 1136 senesinde dahi beher müdresi onar vakiyye olmak üzere İstanbul’a karîb iskele ve yalılardan akçeleriyle iştirâ eyledikleri beş bin müdre hamrın Galata’da hânelerine nakline mümâna‘at olunmayıp zâbitlerden ve âhardan harc ve avâyid nâmıyla akçe mutâlebesiyle rencîde vü remîde etdirilmemek bâbında hükm-i hümâyûnum ricâ ve dîvân-ı hümâyûnumda mahfûz olan kuyûd-ı ahkâma mürâca‘at olundukda vech-i meşrûh üzere emr-i şerîf verilegeldiği mastûr ve mukayyed bulunmağın verilegelen emr-i şerîf mûcebince nakline mümâna‘at olunmamak bâbında fermân-ı âlîşânım sâdır olmuşdur vusûl buldukda bu bâbda sâdır olan fermân-ı celîlü’l-kadrim mûcebince amel edip dahi vech-i meşrûh üzere sene-i mezbûrede beher müdresi onar vakiyye olmak üzere İstanbul’a karîb iskele ve yalılardan akçesiyle iştirâ eyledikleri beş bin müdre hamrın Galata’da vâki‘ hânelerine nakline mümâna‘at olunmayıp ve Galata voyvodası ve ümenâ ve zâbitler tarafından min-ba‘d gümrük ve bâc ve avâyid ve harc nâmıyla vesâir bahâne ile akçe mütâlebesiyle rencîde ve remîde etdirmeyesiz şöyle bilesiz alâmet-i şerîfe i‘timâd kılasız. Fi’t-târihi’l-mezbûr. [Be-makām-ı]Kostantıniyye.