Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 391 Hüküm no: 438 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitraşko ve kardeşinin Kuruçeşme’de oturdukları evde Rohsandere isimli şahsın alakası olmadığından evden çıkarılmalarına mani olunması Mûcebince Patrîk-i Rum Gabril getirdip vukūfu olanlardan tefahhus ve i‘lâm eyleye deyu. Devletlü ve sa‘âdetlü ve merhametlü sultânım hazretleri sağ olsun bu bî-kes ve bî-çâre kulları Kuruçeşme’de vâki‘ anamızdan muntakıl bir köhne menzile mutasarrıf ve derûnunda sâkin iken bu def‘a gāyet ile şerîre olan Ruhsandere nâm Nasrâniye zuhûra gelip menzil-i mezkûr on dokuz sene mukaddem benim idi zevcim dahi vâlidenize fürûht etmiş deyü şirret-i da‘vâya tasaddî ve cevre şerîr kimesnelere ve şâhid-i zûrda olanlara rüşvet arz ve menzil-i mezkûru almak murâd ve gadr sadedinde olmağla husûs-ı mezbûru Rum Patriği Markar’a bilürler ve dîvân tercümânı vesâir vukūfu olan Rum tâifesinden tefahhus ve suâl ve husûs-ı mezbûru patrik kulları huzûr-ı sa‘âdelerine arz u i‘lâm ve mezbûrenin şirret ve te‘addîsinden halâs buyurulmak bâbında fermân-ı âlî niyâz olunur sultânım hazretlerinindir. Bendehâ-yı Dimitraşko ve karındaşı. Husûs-ı mezbûr tezvîr ve cümleyi mutazammın olmağla fîmâ ba‘d bir tarîkle dahi fermân-ı âlî ısdâr edip hükkamda yine mürâfa‘a ederse kat‘an ısgā olunmayıp hilâf-ı şer‘ te‘addîsi men‘ olunmak buyruldu. Devletlü sa‘âdetlü sultânım hazretleri sağ olsun. Bu kulları İstanbul ve tevâbi‘i Rum patriği olup sâdır olan fermân-ı âlîlerine imtisâlen metropolitleri fukarâları ve Dîvân-ı hümâyûn tercümânı ve Eflak ve Boğdan kapu kethudâları vesâir vukūfu olanlardan suâl olundukda derûn-ı arzuhâlde menzil-i mezkûr sâhib-i arzuhâl Dimitraşko ve karındaşına vâlidelerinden muntakıl menzil olur ve on dokuz seneden beri bilâ-nizâ‘ mutasarrıf olduklarını haber verdiklerinden gayri mezbûre Rohsandere Nasrâniyenin menzil-i mezkûrda aslâ alâkası yokdur deyü her biri cevâb ve iddi‘âsı lağv-ı mahz olduğu nümâyân ve bu kullarının dahi ma‘lûmu olmağla manzûr-ı âlîleri buyuruldukda her ne yüzden fermân-ı âlîleri şeref-südûr ederse ol bâbda emr [ü] fermân sultânım hazretlerinindir. Bende Ermiya, Patrik-i İstabul-ı Rum. Beşiktaş nâibi efendi şer‘le görüp i‘lâm eyleyesiz deyü buyruldu. Devletlü merhametlü sultânım hazretleri sağ olsun bu eytâm kulunuz anadan muntakıl menzili Beyoğlu sâkinelerinden Rohsandere nâm zimmiyye yedine bir müzevver hüccet peydâ edip ve Beşikdaş’a gelip arz-ı ubûdiyyet edip menzil-i mezbûr Kuruçeşme karyesinde olmağla mezbûre menzil-i mezbûru ben sizin babanıza icâre ile verdim deyü da‘vâ ve sahte hüccet ile menzilimizi elimizden almak murâd etmeğle sultânımın merâhim-i aliyyelerinden mercûdur ki Beşiktaş nâibi efendi mesfûrenin peydâ eylediği hüccet ne vechiledir vukūf-ı tâm eylemiş ise i‘lâm eylemek bâbında fermân-ı âlîleri niyâz olunur fermân sultânım hazretlerinindir. Bendegân sâbıkā Boğdan Voyvodası İşua eytâmları. Sahh İ‘lâmı mûcebince mezbûrenin tezvîri zâhir olmağla min-ba‘d müdâhale etdirilmeyip ve bir yerde tekrâr iddi‘â sudûrunda olursa ısgā olunmaya deyü buyruldu. Ma‘rûz-ı abd-i dâ‘î-i Devlet-i aliyyeleridir ki Kasaba-i Beşiktaş’a tâbi‘ Kuruçeşme kurbünde bundan akdem hâlik olan ( ) voyvodası İşuh nâm voyvodanın sâhib-i arzuhâl eytâmları olup târih-i i‘lâmdan on dokuz sene mukaddem karye-i mezbûrede vâki‘ Yorgaki nâm zimmînin eytâm-ı mezbûrun anası Domine Katrine nâm Nasrâniye iştirâ eylediği menzile hâlâ zuhûre eden Beyoğlu sâkinelerinden Roksandere nâm Nasrâniye mahkeme-i Beşiktaş’a gelip Rebî‘ülâhir târih ile imzâ ve zeylinde şâhidleri yok bir beyâz kağıda tahrîr olunmuş bir müzevver hüccet menzil-i mezbûr Kiryazo mülkü olup eytâm-ı mezbûrun anasına ve babasına icâre ile vermiş ola Yuvanitce vekâletiyle olmuş olup bu gûne tezvîre sâlike olduğundan bu fakīre elbette şu kağıdı mühürle deyü ibrâm bu fakīr men ola ve âhara müzevver hüccetine nazar eyleyip mezbûre Roksandere eytâm-ı mezbûrun yedinden menzil-i mezbûru bu tarîkle almak zu‘miyle tasaddî kasd eylediği lede’ş-şer‘ zâhir ve bâhir olmağla mezbûre Roksandere mahfel-i kazāda cerh olunup vech-i muharrer üzere vukūf-ı tâm eylediğim üzere eytâm-ı mezbûr iltimâsıyla huzûr-ı âlîlerine i‘lâm olundu. Fî 19 N sene 1137. El-abdü’d’dâ‘î el-fakīr Şeyhi Abdurrahim en-nâib bi-kasaba-i Beşiktaş.