Galata Mahkemesi 259 Numaralı Sicil (H. 1137-1138 / 1724-1725) cilt: 63, sayfa: 393 Hüküm no: 439 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tophane’deki demircilerin nizam-ı kadime muhalefetle çivici esnafını rencide etmemeleri Akzā kuzāti’l-Müslimîn evlâ vülâti’l-muvahhidîn ma‘deni’l-fazl ve’l-yakīn râfi‘u a‘lâmi’ş-şerî‘ati ve’d-dîn vâriseyi ulûmi’l-enbiyâ ve’l-mürselîni’l-muhtassîn bi-mezîdi inâyeti’l-meliki’l-mu‘în İstanbul ve Galata kādıları -zîdet fezāiluhümâ- ve kıdvetü’l-emâcid ve’l-a‘yân hâssa mi‘mârbaşı Mehmed -zîde mecduhû- tevkī‘-i refî‘-i hümâyûn vâsıl olıcak ma‘lûm ola ki Galata’da vâki‘ çivici esnâfı südde-i sa‘âdetime arzuhâl edip mezbûr kadîmden İstanbul ensercilerine yamak olup ve vâki‘ olan tekâlîflerini ma‘an edâ edip dahl olunmak îcâb etmez iken Tophane’de vâki‘ demirciler tâifesi zuhûra gelip nizâm-ı kadîmlerine mugāyir tekâlîfi bizim ile ma‘an verin deyü te‘addîden hâlî olmadıklarını bildirip men‘ olunmak bâbında hükm-i hümâyûnum ricâ ve sâdır olan fermân-ı âlîye imtisâlen Galata’da mismâr kat‘ eden çivici tâifeleri müteveffâ mi‘mâr-ı hâssa Arnavud Mustafa’nın zamân-ı mi‘mârlığında bin yetmiş târihinde İstanbul’da vâki‘ enserci tâifelerine yamak ta‘yîn ve tahsîs olunup târih-i mezkûrdan bu âna gelince vâki‘ olan teklîf ve tekâlîflerin İstanbul eksercileri ile ma‘an edâ eylediklerini müsin ve ihtiyârları haber verip ve Tiflis tarafına sefer-i hümâyûna fermân-ı âlî üzere irsâl fermân olunan dökmeci ve kalyeci esnâfımız ile hâlâ kazgancılara yamak olunup hâlimize göre imdâd ve i‘ânet ederlerken şimdi Tophane kurbünde Çavuşbaşı’nda sâkin demirci tâifeleri nizâm-ı kadîme mugāyir bize dahi i‘ânet edin deyü mezkûrları rencîde eylediklerini cem‘-i gafîr ve cemm-i kesîr esnâf-ı merkūmîn haber vermeleriyle ba‘de’l-yevm dahi nizâm-ı kadîmleri merkūmlarının yamakları olan İstanbul eksercileri ile ma‘an fermân-ı âlî üzere vâki‘ teklîflerin hâllerine göre verip hilâf-ı kānûn nizâm-ı kadîme mugāyir mezkûr demirciler rencîde etmemek üzere emr-i şerîfim iltimâs eylediklerin sen ki mi‘mârbaşı mûmâ-ileyhsin i‘lâm eylediğin ecilden vech-i muharrer üzere amel olunmak emrim olmuşdur vusûl buldukda bu bâbda sâdır olan emrim üzere amel dahi tâife-i mezkûre vâki‘ olan teklîflerin İstanbul ensercilerine ma‘an edâ eylediklerinden sonra hilâf-ı kānun nizâm-ı kadîme mugāyir mezkûr demircilere rencîde ve remîde etdirmeyip mazmûn-ı emr-i şerîfimle âmil olasın şöyle bilesin alâmet-i şerîfe i‘timâd kılasın. Tahrîren fî-evâil-i Şevvâl sene seb‘a ve selâsîn ve mi’e ve elf.