Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 92 Hüküm no: 33 Orijinal metin no: [3b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Atike bt. İbrahim’e Behram adlı küçük gulâmını emzirip büyüten Ayşe bt. Ömer’e ücretini ödeyip gulâmını teslim almasının tembih olunduğu Mahrûse-i Galata hâricinde Kâtib Mustafa Çelebi Mahallesi’nde sâkine ve zâtı mu‘arrefe sâhibe-i arzuhâl Âişe Hatun bt. Ömer Çarşamba günü dîvân-ı âlîlerinden ba‘dehû mahrûse-i mezbûre mahkemesinde ma‘kūd meclis-i şer‘-i münîrde derûn-ı arzuhâlde ismi mezkûre kezâlik zâtı mu‘arrefe Âtike Hatun bt. İbrahim muvâcehesinde mezbûre Âtike Hatun müstakilleten mâlike olduğu işbu hâzır bi’l-meclis Behram b. Abdullah nâm sagīr gulâmını müddet-i rıdâ‘da iken irdâ‘ ba‘dehû terbiye ve imsâk ile mukābelesinde sana beher şehr beş vakıyye lahm-ı ganem ve bir vakıyye sabun ve bir vakıyye revgan-ı zeyt ve beş guruş ücret vereyim deyip bu vechile bana def‘ u teslîm ben dahi bi’r-rızâ ba‘de’t-tesellüm gulâm-ı sagīr-i merkūm Behram’ı târih-i i‘lâma gelince elli dört ay menzilimde irdâ‘ ve terbiye ve imsâk edip ücret-i müsemmâdan müddet-i merkūmede müstahikka olduğum nakd-i mezbûr şehriye beşer guruşdan mezbûrenin zimmetinde müctemi‘ iki yüz yetmiş guruşun yirmi guruşunu ahz bâkī iki yüz elli guruş ile zehâir-i mezkûrenin vech-i şer‘î üzere kıymetlerini bana edâ ve teslîm-birle gulâm-ı sagīr-i merkūm Behram’ı yedimden ahza mâlikesi mezbûre Âtike Hatun’a tenbîh olunmak matlûbumdur deyü da‘vâ eyledikde mezbûre Âtike Hatun dahi cevâbında ber-vech-i muharrer mâlike olduğu gulâm-ı sagīr-i merkūmu ancak şehriye beşer guruş ücret tesmiyesiyle irdâ‘ ve terbiye ve imsâk için müdde‘iye-i mezbûreye teslîm eylediğini ve ücret-i müsemmâ-yı merkūm şehriye beşer guruşdan elli dört ayda müctemi‘ iki yüz yetmiş guruşdan bâkī iki yüz elli guruş zimmetinde deyni olduğunu ikrâr mâ‘adâ zehâir-i mezkûre müdde‘âsını külliyyen inkâr etmekle müdde‘iye-i mezbûrenin zehâir müdde‘âsını isbâta ba‘de’l-havâle mezbûre Âtike Hatun’un ikrârıyla lâzım gelen meblağ-ı bâkī-i merkūm iki yüz elli guruşu müdde‘iye-i murzi‘a-i merkūme Âişe Hatun’a edâ ve teslîm-birle mâlike olduğu gulâm-ı sagīr-i merkūm Behram’ı ahza mezbûre Âtike Hatun’a tenbîh olunduğu tescîl ve mübâşirleri dîvân-ı âlî çavuşlarından Abdullah Çavuş kulları yediyle bi’l-iltimâs huzûr-ı âlîlerine i‘lâm olundu bâkī emr hazret-i veliyyü’l-emrindir. Fî 14 M sene [1]221.