Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 206 Hüküm no: 261 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Azîze Hatun’un eski kocası Mehmed Salih Beşe’den mehir bedeli olarak yirmi beş guruş alacağı olduğu Galata hâricinde Kuloğlu Mahallesi’nde sâkine zâtı mu‘arrefe Şerife Azîze bt. es-Seyyid Ahmed nâm hatun Galata Bâb Mahkemesi’nde meclis-i şer‘de zevc-i mutallıkı Dergâh-ı âlî topçularının elli dört cemâ‘atinin top kalfası Mehmed Salih Beşe b. Mehmed nâm kimesne muvâcehesinde mezbûr Mehmed Salih Beşe zevc-i dâhilim iken târih-i i‘lâmdan bir ay mukaddem beni tatlîk etmekle zimmetinde mütekarrir ve ma‘kūdun-aleyh mehr-i müeccel hakkım olan yirmi beş guruşu mezbûr Mehmed Salih Beşe’den taleb ederim deyü da‘vâ ettikde ol dahi cevâbında husûs-ı mezkûru bi-tamâmihî ikrâr u i‘tirâf etmeğin alâ-mûcibi ikrârihi meblağ-ı mezkûr yirmi beş guruşun müdde‘iye-i mezbûre Şerife Azîze Hatun’a edâsıyla mezbûr Mehmed Salih Beşe ilzâm olunduğu mübâşirleri topçu kullukçularından Osman Çavuş kulları yediyle huzûr-ı âlîlerine i‘lâm olundu. Fî 22 Ca sene [1]221.