Galata Mahkemesi 580 Numaralı Sicil (H. 1221-1222 / M. 1806-1808) cilt: 84, sayfa: 210 Hüküm no: 269 Orijinal metin no: [25b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çengelîoğlu İbrahim Kapudan’ın Yelkenci Halil Ağa’nın emriyle onun adına alacaklısına ödediğini iddia ettiği faizi kendisine iade etmesi için açtığı davanın meşru olmadığı Galata’da sâkine Çengelîoğlu İbrahim Kapudan b. Mustafa nâm kimesne Galata Bâb Mahkemesi’nde meclis-i şer‘-i kavîmde Yelkenci Halil Ağa b. Ömer nâm kimesne muvâcehesinde mezbûr Halil Ağa’nın gāib ani’l-meclis tüccârdan Bedros v. Manil nâm zimmîye ma‘lûmü’l-vezn halat semeninden zimmetinde deyni olan dört bin sekiz yüz guruşa ben bundan akdem kefîl ve zâmin olduğumdan sonra dâyin-i gāib-i mersûm meblağ-ı mezkûru kefâletime binâen mütâlebe ve beni tazyîk eylediğini medyûn-ı mezbûr Halil Ağa’ya ifâde ve ihbâr eylediğimde mezbûr Halil Ağa dahi “âhardan ol mikdâr guruşu bana karz alıver ve ribhini üzerine ilzâm eyle ba‘de[hû] ben sana vereyim” demekle ben dahi âhardan dört bin sekiz yüz guruş karz alıverip bin beş yüz doksan guruş ribh ilzâm eylediğimden sonra mezbûr Halil asl-ı deyn-i merkūm dört bin sekiz yüz guruşu tamamen edâ ve teslîm edip ribh-i merkūmu bana vermemekle ribh-i merkūm bin beş yüz doksan guruşu mezbûr Halil Ağa’dan hâlâ taleb ederim deyü takrîr-i meşrûhu üzere tasaddî eylediği ribh da‘vâsı kütüb-i fıkhiyyeden Bezzâziye’nin “Vekîlün bi’l-istikrâz” bâbında ve Muhît-i Bürhânî’sinin ….? başında tasrîh buyrulan “emru bi-rehni şey’in ve iltizâmu ribhin alâ-en yü’eddiyehû el-emru fazlun lâ yasihhu ve lâ yerci‘u li-ademi sıhhati’l-emr” kavl-i şerîfleri mantûkunca sahîha ve mu‘tebere olmamağla mûcebince müdde‘î-i mezbûr İbrahim Kapudan da‘vâ-yı mezkûresiyle mezbûr Halil Ağa’ya bî-vech-i şer‘î mu‘ârazadan men‘ olunduğu bi’[l]-iltimâs huzûr-ı âlîlerine i‘lâm olundu. Fî 18 Ca sene [1]221.